省佛通衢

省佛通衢（粵拼：saang2 fat6 tung1 keoi4）係歷史上廣州同南海、佛山之間嘅第一條陸路交通要道，明朝起好，一路用到二十世紀六七十年代。

建設原因同經過

未有省佛通衢之前，珠三角交通以水路為主，廣州同佛山之間都唔例外。但係明朝末年開始有水盜悍匪殺人越貨。當時官府先係起防禦工事，增設崗哨，積極剿匪，後來崇禎七年（1634年）兩廣總督熊文燦等人決定起條路，當時叫「廣州城西度海陸路」，係後來省佛通衢一部分。當時嘅人好重視爾件事，好多官員富紳紛紛捐錢。珠三角河網密布，條路自然要起好多條橋。有唔少橋都係由鄉紳出錢出力來起，亦有唔少地方唔方便整橋，就保留渡口。當時條路經過嘅地方大部分係漁地。為咗起爾條路，用土石填埋咗唔少漁地。起路方法可以用「疊石於下以固其基，增石於上以廣其途」來描述。

完工嗰時，計有十六座橋同八處渡口。

《熊文燦修廣州城西度海陸路碑記》係研究爾段歷史嘅重要資料。

名

省佛通衢個名最早見於清同治年間《南海縣志》，清宣統二年期間曾經改名叫省佛車路。

行向

省佛通衢大體上經過而今嘅下列地方：芳村－穗鹽路－鹽步－大瀝－禪城

而今嘅穗鹽路基本上係喺省佛通衢基礎上改建而成。

主要橋樑

下面大致按橋樑規模（長度）降序排列，

煙滸橋，1917年建成，連起鹽步蟾溪兩岸，1949年之前已經拆毀，橋碑仍保留，直到1970年拆毀；
通福橋，又叫五眼橋，喺石圍塘，明萬曆年間起好，長42.8米，按照建成時間又被稱為「省佛通衢第一橋」，今廣東省文物保護單位；
東三眼橋，喺鹽步河東虎榜村，明崇禎年間起好，長28.2米，而今喺正大馬路中間綠化帶道，保護較好，係佛山市文物保護單位。
三眼橋（溪頭橋），喺鹽步溪頭，明崇禎年間起好，長28米，1975年起公路拆毀；
一眼橋（龐公橋），喺鹽步溪頭，明崇禎年間起好，長13.1米，1975年起公路拆毀；

參考

吳振宇 (2009)。〈廣佛古道——"省佛通衢"考〉。《嶺南文史》 (3)。