睚魯嘅女復活

睚魯嘅女復活係《聖經》記載耶穌嘅神蹟之一，喺《馬太福音》、《馬可福音》同《路加福音》都有記載。

聖經譯文

「	耶穌到咗會堂主管嘅屋企，見到吹鼓手同亂哄哄嘅一班人，就話：「返去啦！呢個女仔未死，而係瞓着咗。」佢哋就嘲笑佢。人群被趕出之後，耶穌就入去，拉住佢隻手，女仔就起身。於是呢個消息傳遍咗嗰個地方。	」
——《馬太福音》9章23-25節

「	耶穌重係講緊嘢嘅時候，有人由會堂主管嘅屋企趕嚟，話：「你個女死咗，何必再麻煩老師呢？」耶穌聽到佢哋講嘅嘢，就對會堂主管話：「唔使怕，只要信！」於是佢帶住彼得、雅各同雅各嘅細佬約翰一齊去，唔准其他人跟住佢。佢哋嚟到會堂主管嘅屋企，耶穌見到佢哋好嘈，並有人大喊大叫，就入到裏面，對佢哋話：「點解大吵大鬧呢？佢唔係死咗，係瞓着咗。」佢哋就嘲笑耶穌。耶穌將佢哋都趕出去，帶住女仔嘅父母同跟隨嘅人入去女仔間房，就拉住女仔隻手，對佢話：「大利大，古米！」意思即係話：「女仔，我吩咐你，起身！」嗰個女仔即刻起身行，佢已經十二歲；佢哋就非常驚奇。耶穌鄭重噉吩咐佢哋，唔好畀人知道呢件事，又叫人畀嘢佢食。	」
——《馬可福音》5章35-43節

「	耶穌重係講緊嘢嘅時候，有人由會堂主管嘅屋企趕嚟，話：「你個女死咗，唔使再麻煩老師喇。」耶穌聽到就對佢話：「唔使怕，只要信！佢會好返嘅。」耶穌到咗佢屋企，除咗彼得、約翰、雅各，同女兒仔嘅父母，唔准其他人一齊入去。嗰度嘅人都為呢個女仔大喊大叫。耶穌話：「唔好喊，佢唔係死咗，係瞓着咗。」佢哋知道女仔已經死咗，就嘲笑耶穌。耶穌拉住女仔隻手，呼叫話：「女仔，起身啦！」佢嘅靈魂就返咗嚟，佢立即起身。耶穌叫人畀嘢佢食。女仔嘅父母非常驚奇；耶穌吩咐佢哋唔好將所發生嘅事話畀任何人知。	」
——《路加福音》8章49-56節

概覽

睚魯嘅工作崗位係主持會堂嘅行政同會堂中所有嘅禮拜事宜。猶太人嘅會堂係社區中心，做呢個職位嘅人係社區賢才，非常受敬重，因此睚魯係個成功人士。喺佢睇嚟人生冇乜不足之處。就喺呢個時候，佢嘅獨生女病重，就快死，令到佢心中驚得六神無主。所以嚟到耶穌嗰度，跪喺佢腳前，求耶穌醫治。但係，睚魯嘅信心唔及百夫長嘅信心咁大。耶穌話：「唔使怕，只要信！」係要激勵睚魯嘅信心。惟有信心先至能夠消除懼怕。呢句說話能夠幫助有懼怕嘅人，堅固受試煉嘅人，激勵多勞苦嘅人，安慰就快去世嘅人。