《破·地獄》（The Last Dance，曾經叫《度脫之舞》）係2024年上畫嘅港產片，由陳茂賢執導，許冠文同黃子華主演。故仔用殯儀業做題材。
喺疫情肆虐生意蕭條嘅市道之下，婚禮策劃師魏道生（黃子華飾）被迫改行成為一名喪禮經紀人。起初因為理念不合同喃嘸師傅文哥（許冠文飾）產生好多衝突，因為面對一位特殊要求嘅客人、文哥嘅出手相助、親身經歷文哥同女兒文玥（衛詩雅飾）相處嘅點點滴滴，亦慢慢改變咗道生對職業同生活嘅態度。
- 電影上映20日，港澳票房超過1億港紙，係歷嚟第三套有呢個成績嘅港產片，更係歷嚟用最短時間做到嘅港產片。
- 電影上映23日，香港票房超過1.1億港紙，打破《九龍城寨之圍城》紀錄，成為香港2024年全年最高票房華語電影。
- 電影上映29日，香港票房超過1.22億港紙，打破2023年《毒舌大狀》紀錄，成為香港歷嚟最高票房華語電影（未考慮通脹因素）。
- 電影上映49日，香港入場人次超過211.3萬（票房接近1.4億港紙），打破1982年《最佳拍檔》紀錄，成為香港歷嚟最高入場人次華語電影。
- 電影係繼1992年《神算》後許冠文同黃子華再一次合作演出。
- 開鏡時傳媒報道岑珈其同谷德昭都有份參演呢套戲，其中岑珈其本嚟飾演魏道生細佬，但公映版本兩人所有戲份都被剪走晒。
