秋楓峒
秋楓峒，亦叫秋楓，屬廣州市從化區太平鎮秋楓行政村管，佔地10km²。秋楓峒喺北宋開村，清代屬從化縣馬村堡[1]。世居村民姓鍾。2014年定為廣州市傳統村落。
佈局
編輯秋楓峒前水後山，坐東朝西，典型梳式佈局。中心係酉四祖祠同酉七祖祠，週邊係民居。民居順山勢而起，座向一致，錯落有序。村面建築唔係平列式，酉四祖祠一路建築向前突出，民居逐漸升高。秋楓峒嘅主巷係忠安里、長安里、仁和里，街巷地面鋪石春。由於地面縱橫高低唔同，村民喺規則佈局之中特登開一條南北向嘅巷仔。中心祠堂係硬山頂，民居起成懸山頂來遮雨。民居係磚、木、石結構，多數三間兩廊佈局，亦有幾間係五間兩廊嘅大宅，正廳前櫺格通花落地罩[2]。外圍有村牆，其中村面一段係花崗岩牆腳。南北有兩個門樓。村面水塘長堤連去石路。
村史
編輯北宋後期，防禦使鍾軾嘅四世孫鍾隆信由龍騰里（而家太平鎮屈洞村）搬來呢邊。相傳開村初期，巫師相信秋風能夠消滅山妖，於是起「秋風」做村名，後尾將「風」改成「楓」[2]。清代屬從化縣馬村堡[1]，1960年代屬從化縣秋風大隊，後來改屬從化區太平鎮秋楓行政村。而家秋楓峒鍾氏族人有兩干幾，舊村村民搬去村外圍起新屋住。
古蹟
編輯| 名 | 始建年份 | 地址 | 現況 |
|---|---|---|---|
| 秋楓村圍 | 待考 | 忠安里前 | 尚存 |
| 忠安樓 | 待考 | 忠安里 | 尚存 |
| 酉四祖祠 | 明末 | 忠安里 | 尚存，從化市登記保護文物單位 |
| 酉七祖祠 | 明末 | 忠心里左 | 尚存，從化市登記保護文物單位 |
| 子記書舍 | 清 | 忠心里右 | 尚存 |
| 傳統民居 | 南宋至清 | 村入邊 | 尚存 |
交通
編輯- 巴士：
- 秋風路口站：351路