穆爾塔扎·艾哈邁迪

 穆爾塔扎·艾哈邁迪（粵拼：muk6 ji5 taap3 zaak3 ngaai6 haa1 maai6 dik6） （普什圖文：مرتضى احمدی‎；2011年—）係阿富汗男仔兼美斯波迷。2016年頭因為著咗件由膠袋整嘅美斯波衫而一炮而紅。2016年12月，聯合國難民署為佢安排見美斯，但係就因為噉而俾人恐嚇，要搬屋逃亡。

事蹟

一炮而紅

艾哈邁迪係阿富汗窮人，自細就好鍾意美斯，佢曾經話過：「我好鍾意美斯，佢踢波踢得好好。」

艾哈邁迪因為屋企窮得滯，冇錢買美斯嘅波衫，所以響2016年頭，艾哈邁迪嘅阿哥就用鄰居用完唔要嘅藍白間線膠袋，幫佢響上高寫咗「Messi 10」，整咗件「美斯波衫」。佢著住呢件「波衫」嘅相噏撈咗上網之後即刻爆紅，引起全城關注，甚至有波迷發起聯署，幫艾哈邁迪圓見美斯嘅心願。

見美斯

2016年12月，美斯所屬嘅巴塞隆拿去卡塔爾多哈踢友誼賽，聯合國難民署搭飛機安排艾哈邁迪去見偶像。艾哈邁迪負責擺個波響中圈，重同美斯拖手。最後因為太開心而唔想走，要由球證抱走。美斯之後亦都有送一件真嘅「美斯波衫」同一個波畀艾哈邁迪。艾哈邁迪話：「我好開心見到我個英雄！」

俾人恐嚇

艾哈邁迪見完美斯返阿富汗後，屋企人成日收到恐嚇電話。艾哈邁迪個老豆擔心艾哈邁迪會俾人綁架，所以帶埋全家一齊搬去巴基斯坦奎達市住落先。