第54演播室電臺聯播網

第54演播室電臺聯播網 Radio Studio 54 Network
所屬國家或地區	意大利
總部所在	意大利卡拉布里亞羅其里
播放地區	意大利
開播	1985年6月6號 (1985-06-06)
主要語言	意大利話
使用頻段	FM
電臺口號	Il bello della musica è che quando ti colpisce non senti dolore.（意大利文） （語出巴布·馬利。譯：音樂嘅美妙在於，當佢打正人心時，竟然唔覺痛。）
擁有者	弗蘭車斯戈·墨沙拉 （Francesco Massara）
電臺官網	官方網站 （意大利文）
收聽方式
地面廣播
壢佐卡拉布里亞：若尼卡	FM 101.8, 102.9, 106.4MHz
壢佐卡拉布里亞：鐵里挪、維波華倫地亞、拉美治亞地美	FM 102, 105.7, 106.3 MHz
戈羅陀尼、戈星乍鐵里挪	FM 106.5 MHz
戈星乍、倫地、沙夫陀	FM 95.8, 96.2 MHz
斯巴里鐵地、洛沙挪、戈里也挪	FM 95.8 MHz
卡斯陀域拉里	FM 93.5 MHz
墨西拿	FM 106.5 MHz
壢車	FM 106.3 MHz
線上收聽
流媒體	點擊收聽

 第54演播室電臺聯播網（粵拼：dai6 ng5 sap6 sei3 jin5 bo3 sat1 din6 toi4 lyun4 bo3 mong5） （意大利文：Radio Studio 54 Network）係一間喺意大利卡拉布里亞羅其里嘅私人電台，喺1985年由兩位老友開設播出，主要向意大利南部嘅卡拉布里亞、西西里、普也呢三個大區做廣播，除咗有24小時嘅FM廣播外，重有透過流媒體喺網上嘅節目播出，全世界都能夠上網收聽。

喺呢個三區當中，主要廣播嘅省份有墨西拿省、壢佐卡拉布里亞省、維波華倫地亞省、卡坦乍羅省、戈羅陀尼省、壢車省、波廳乍省同埋沙里挪省。節目嘅特色係每日提供28次更新嘅即時資訊同埋流行音樂。

史

第54演播室電臺聯播網喺1985年6月6號成立，當時嘅名叫「第54演播室電臺DJ俱樂部」（Radio DJ Club Studio 54），由皮耶陀·帕壢他（Pietro Parretta）同埋弗蘭車斯戈·墨沙拉（Francesco Massara）提出搞起，再搵埋英佐·吉妥（Enzo Gatto）、文摩·綿尼地（Memmo Minniti）、皮耶陀·慕斯美池（Pietro Musmeci）幫手。呢兩個創始人係對老友，佢哋創辦電臺嘅位置喺羅其里嘅唐·域多利奧大街（Via Don Vittorio）148號。電臺嘅口號叫做：「Il bello della musica è che quando ti colpisce non senti dolore.」，係用意大利文譯出嘅出名歌手巴布·馬利嘅金句，意思係「音樂嘅美好之處，在於佢擊中人時，竟然唔覺痛」。

就好似大多數免費電臺噉，呢個臺班友開來玩嘅啫，直到1990年代早期，先發覺可以轉做商業臺。

1990年意大利頒行曼美法，呢部法係監管電臺廣播嘅，於是呢個私人電臺轉做商業臺，註冊咗公司。

1991年，呢個電臺起用電臺數據系統，成爲卡拉布里亞第一個用呢個系統嘅電臺，亦係意大利最早用呢個系統廣播嘅電臺之一。

1994年，因爲信號數字化，自此用模擬信號機再都收唔到廣播信號。呢下係卡拉布里亞乃至意大利第一次全面應用數字化信號技術。

1995年起，因爲收購其他卡拉布里亞嘅電臺股份，間電臺以卡拉布里亞嘅聽眾做基礎，向鄰近地區進軍，而佢原先廣播範圍就得壢佐卡拉布里亞省嘅愛奧尼亞海岸綫一帶。

1997年，呢間電臺係意大利第一批搞廣播試驗嘅電臺之一，尤其係網上廣播技術中嘅實時播音（RealAudio）。

1998年，佢改名做「第54演播室電臺聯播網」。

2000年，間電臺整咗間移動廣播站「星際之門」（Stargate），於是電臺嘅廣播有咗新花臣：可以即場報道，聽眾可以聽到現場氣氛。

主要節目

• 《新聞54》（54 News）：每日朝早七點到夜晚九點嘅實時新聞，每隔一個鐘嘅準點報道
• 《原聲──收音機電影》（Soundtracks - il cinema alla radio）：喺朝早八點八個字、晏晝三點兩個字、夜晚十一點正播出
• 《唱片推介》（Promodisco）：喺中午十二點八個字、晏晝五點八個字、夜晚七點八個字播出
• 《54區──全日》（Area 54 - All days）：喺晏晝兩點半、夜晚九點半播出
• 《90件》（Pezzi da 90）：夜晚十點正播出
• 《意大利搖滾》（Rock Italia）：朝早八點八個字、朝早九點九個字、夜晚九點四個字、夜晚十一點九個字播出
• 《頭版意大利》（Italia in Prima Pagina）：有深度分析嘅資訊節目，喺朝早六點到朝早十點播出
• 《搖滾集輯》（Rock Collection）：喺晏晝兩點、夜晚九點播出
• 《勁歌金曲54》（54 Disco Hit）：喺朝早七點半、晏晝一點正、黃昏六點正、夜晚十點正播出
• 《午夜搖滾》（Rock a Mezzanotte）：午夜之後播出
• 《巡遊行動》（Action Parade）：喺朝早九點九個字、夜晚十點四個字播出
• 《Ipod終極輯》（The Ultimate Ipod Collection）：喺朝早十點四個字、凌晨兩點四個字播出
• 《限量版》（Edizione Limitata）：喺夜晚八點八個字、凌晨三點八個字播出
• 《不可思議音樂會》（Concerto Impossibile）：喺凌晨三點四個字、夜晚八點八個字播出
• 《情絲緒語》（Emozioni）：從夜晚十一點半開始播出
• 《似曾相識》（Dejà vu）：從中午十二點半開始播出
• 《明星》（Celebrity）：喺朝早十點兩個字、夜晚九點半播出
• 《古仔》（Storie）：喺晏晝兩點正、黃昏六點八個字播出
• 《貓同狐狸開band騷》（Il Gatto e la Volpe Band Show）：喺中午十二點半、晏晝兩點半、夜晚七點四個字播出
• 《同路查挪·普羅戈丕柯嘅歷史時間》（History Time with Luciano Procopio）：喺晏晝一點半、夜晚十一點半、凌晨五點正播出
• 《私家壓片》（Special to Compact Disk）：喺朝早十點四個字、凌晨兩點四個字播出

電臺人員

2012-2015年時，電臺有呢啲主要人員：

• 弗蘭車斯戈·墨沙拉（Francesco Massara），電臺主人同時係總編輯
• 路查挪·普羅戈丕柯（Luciano Procopio），主持
• 洛兆拉·剌化車(Rossella Laface)，主持
• 巴柯羅·士亞（Paolo Sia），主持
• 亞歷士·亞巴挪（Alex Albano），主持
• 英佐·地基耶拉（Enzo DiChiera），主持
• 朱什皮·羅密歐（Giuseppe Romeo），聲音編輯
• 綿摩·地·馬戈（Mimmo De Marco），混音編輯
• 歐多·古逸他（Aldo Cuglietta），特別活動責任人
• 弗蘭車斯戈·竇照羅（Francesco D'Augello），音樂節目編輯
• 地美提柯·馬遮利（Demetrio Malgeri），主持
• 馬利卡·陀池維亞（Marika Torcivia），主持
• 弗蘭戈·西西里亞挪（Franco Siciliano），主持
• 馬拉·利基基（Mara Rechichi），主持
• 路易治·地·地耶戈（Luigi Di Dieco），主持

第54演播室現場巡遊

第54演播室現場巡遊（Studio 54 LiveTour）係自2000年搞起嘅戶外互動。靠住電臺裝備嘅「星際之門」，呢個活動一路行一路開騷，同時用電臺、網絡直播，會搞足成日，啲活動包括請啲特別嘉賓、放歌、玩遊戲、做啲娛樂節目、劈歌劈舞。佢哋亦可以開車去啲活動現場，直接參與當地活動，成爲活動嘅一部份，比如佢哋參與過2007年嘅聖利摩音樂節。

第54演播室天使

第54演播室班靚女天使

間電臺請咗班靚女來做電臺大使，叫做第54演播室天使。佢哋幫電臺所有外聯活動撐場，喺2010年變成支靚女隊，去搞啲現場互動，包括間電臺無去發動嘅活動。

佢哋出場活動時配備咗啲車，比如越野車或者開篷車，噉就可以快脆到場，同時作爲活動道具。

佢哋呢支外聯隊係從意大利國內揀來嘅女仔，負責喺意大利全國推廣電臺，直接同啲企業、外聯機構合作、服務。

第54演播室星際之門

「星際之門」承擔電臺站啲主要活動以及戶外現場廣播。呢個移動電臺站配備齊全，主要有三件套：一個音視頻嘅控制臺，外加兩個製作、後期製作、音視頻即時傳輸用嘅設備。