納粹大屠殺中嘅細路

納粹大屠殺中嘅細路係脆弱嘅受害者；納粹德國認為細路係「唔需要」同「危險」嘅群體，殺細路係種族清洗嘅一部分。

遭遇

大屠殺中嘅細路通常會受到以下嘅遭遇：喺抵達集中營之後被殺、出世之後即刻被殺、俾其他囚犯收埋、強迫勞動或者做醫學實驗嘅研究對象、喺報復行動中被殺。

喺猶太人貧民窟，猶太細路多數係餓死或者死於缺乏足夠嘅衫同居所。德國政府對猶太細路大規模嘅死亡無動於衷，因為佢哋認為貧民窟嘅細路無生產力；亦都因為噉，德國政府通常選擇佢哋同老人家、病人、殘疾人士為進入集中營嘅首要目標同大規模槍殺嘅受害者。

納粹黨衛軍嘅醫生同醫療研究者會用集中營嘅細路做唔人道嘅醫學實驗，例如生化武器實驗同人體實驗，導致佢哋響實驗中喪生。集中營嘅管理當局迫猶太後生仔勞動，佢哋多數會因為惡劣嘅生活條件而喪生。德國當局重會將細路仔關押喺生活條件惡劣嘅集中營，例如關押安妮法蘭姊妹嘅伯根-貝爾森集中營喺1943年到1945年間就有大約35,000人死於當時流行嘅斑疹傷寒。

求生手段

儘管細路仔嘅生存受到好大威脅，佢哋有自己求生嘅方法：有尐偷運食物同藥物進入貧民窟，有尐參加地下抵抗活動；好多細路仔同佢哋嘅親屬逃到猶太游擊隊嘅營地。一尐細路響其他家庭成員保護之下喺唔同嘅地方躲藏。

救援

響1938至1940年之間，有名為難民兒童運動嘅救援組織從納粹德國同被德國佔領嘅領土拯救咗成千上萬嘅猶太細路仔。響1942年至1944年嘅法國，幾乎所有住響利尼翁河河畔勒尚邦嘅新教徒同天主教嘅神父同修女都有收埋猶太細路仔。