紫釵記 (傳奇)

《紫釵記》係明朝戲劇家湯顯祖根據佢自己既早期傳奇劇本《李十郎紫簫記》，又叫做《紫簫記》既基礎上面，改寫而成既，所以《紫簫記》可以話係《紫釵記》既雛形。而《紫簫記》就係湯顯祖早期根據唐代蔣防既傳奇小説《霍小玉傳》改編而成。《紫簫記》全劇總共有34出，而《紫釵記》全劇總共有53出，比《紫簫記》到咗19出。兩套傳奇劇本都係講咗一個李益同霍小玉既愛情故事。《紫釵記》係湯顯祖喺南京做官既時候寫既，《紫釵記》同《牡丹亭》、《南柯記》、《邯鄲記》呢四部湯顯祖以夢做主題而寫既劇本，合稱「臨川四夢」或者「玉茗堂四夢」。 臨川係湯顯祖祖籍江西臨川；而玉茗堂係湯顯祖喺萬曆二十六年（公元1598年）辭官之後新起既屋企。而「臨川四夢」之中，《紫釵記》又俾人認為係四夢之首，係一齣喺春天開始既望春之夢；而《牡丹亭》就係熾熱既仲夏夜之夢，《南柯記》係秋天既失落之夢，《邯鄲記》係冬天既冰雪之夢。

古仔

年過二十歲都未娶老婆既隴西才子李益，喺長安遊學既時候，委託鮑四娘幫佢搵適合既女仔做老婆。四娘應承咗，諗起霍王府既小娘霍小玉，芳齡十六，又靚又叻，而且咁啱四娘又係小玉既歌舞老師，所以就想將小玉介紹俾李益。四娘知小玉會喺元宵節嗰日去賞燈，於是就通知咗李益，叫佢去睇燈。到咗元宵嗰晚，李益同崔允明、韋夏卿兩個好朋友一齊去賞燈。當晚，小玉同老母鄭六娘、丫環浣紗一齊賞燈既時候，忽然見到前面有幾個秀才，於是急忙避開，唔小心跌咗戴喺頭上面既紫玉釵，咁啱得咁蹺李益執到小玉既紫玉釵。小玉發覺唔見咗支釵，到處咁搵，喺搵既過程中，兩個人就見咗面。喺之前，小玉已經喺鮑四娘嗰度聽到過李益寫詩好叻，依家見到面又覺得李益好可愛。第二日，鮑四娘受李益既委託去霍家求親。四娘揸住紫玉釵，話係李益託佢嚟求親既，小玉心中暗自高興，不過就話要等老母決定。鄭六娘聽咗鮑四孃既話，又知道個女無反對，於是應承咗，仲擇咗個良辰吉日。到咗良辰吉日，李益喺兩個朋友嗰度借咗駿馬、僕役，去同小玉成親，婚後二個人情深意濃，係一對模範夫妻。 有一天，天子喺洛陽開場選士，李益想去應試，佢同書童準備行裝出發。李益、小玉難分難捨，不過都忍住傷心，然後嚟個山盟海誓。殿試發榜既時候，李益高中咗狀元，權貴盧太尉想喺進士及第既人當中揀著女婿，於是叫晒佢哋去太尉府見面。李益因為有老婆，所以唔想去太尉府，太尉記恨在心，推薦李益去玉門關外做隨軍參軍，無得返屋企。而李益唔知頭唔知路，高中咗之後就返長安同小玉相聚。到咗使臣嚟宣佈，李益先至知道要即刻去邊關當官，李益只好同小玉再次別離。李益一路風塵僕僕，嚟到玉門關外。節鎮劉公濟係李益朋友，知道新嚟既參軍係李益，好開心。玉門關外有小河西同大河西兩個國家，最近準備歸順吐蕃。李益寫信俾兩國，叫佢哋唔好歸順吐蕃，要歸順天朝，如果唔係就出兵討伐。小玉自從同李益告別之後，朝思暮想。李益亦都係日夜想念小玉，於是畫咗幅《徵人聞笛望鄉》既畫，託人帶俾小玉。盧太尉知道李益搞掂咗兩個邊疆國家，而且得到獎賞，於是又諗計仔，奏請皇上，升李益做孟門參軍，而且要即刻返工。呢個時候盧太尉正好奉命鎮孟門，李益到咗孟門之後，盧太尉又要招李益做女婿。李益推咗佢，話自己有老婆。 盧太尉派人送信俾小玉，同佢講李益已經入贅咗盧府，做咗盧太尉既東床快婿。無幾耐，盧太尉同李益都奉命回朝，盧太尉將李益軟禁咗喺盧府。小玉接到假消息既信之後，好傷心，怨恨李益寡情薄義，但係又唔太相信。為咗搞清楚真相，小玉耗盡所有既家財，最後連紫玉燕釵呢件都變賣埋，又咁啱支釵俾盧太尉買到。盧太尉知道支釵係李益同小玉既定情信物，就搵人扮做鮑四娘既姐姐鮑三娘，將支釵俾李益，仲同佢講小玉已經另嫁他人，所以將之釵賣咗。盧太尉趁機要李益用嗰支釵做聘禮，娶佢個女做老婆，李益拒絕咗。 有個俠士叫黃衫客聽咗李益負情、小玉病重既事，就挾持李益到小玉屋企，等佢哋可以見面，講清楚件事。李益、小玉相見後，互相交代，知道呢一切都係盧太尉指使既。李益攞出紫玉釵，將佢戴喺小玉既頭上。黃衫客又將盧太尉所做既壞事同埋李益、小玉受到既委屈奏俾皇上知道，最後皇上降旨：加封李益做集賢殿學士同鸞台侍郎，霍小玉做太原郡夫人、鄭六娘做滎陽郡太夫人。