朱聿𨮁

朱聿𨮁（粵拼：zyu1 wat6 jyut6；1605年—1647年1月20號）係南明其中一位皇帝，1646年12月到1647年1月在位，建都廣州，因為年號係紹武（但無實際用過），又叫紹武帝。

生平

朱聿𨮁係南明隆武帝朱聿鍵細佬。隆武帝喺1645年登基之後，封朱聿𨮁做唐王。1646年隆武帝過身之後，朱聿𨮁走到廣州。喺南明監國朱由榔由肇慶走咗去廣西之後，蘇觀生等人擁立喺廣州嘅朱聿𨮁做南明皇帝，年號「紹武」。

朱由榔聽到朱聿𨮁登基做皇帝之後，返番去肇慶登基做皇帝，年號「永曆」，就係永曆帝。永曆帝派人去廣州勸朱聿𨮁取消稱帝，畀對方拒絕咗，仲斬埋永曆帝派去嘅人。

廣州嗰邊派兵攻打肇慶嗰邊，永曆軍輸咗。但係呢個時候清兵突襲廣州，捉咗紹武帝，之後紹武帝死咗。之後南明剩番永曆帝嗰邊嘅勢力。