網上音樂會

網上音樂會，係指一啲音樂人經網上直播進行嘅音樂演出，除咗流行音樂嘅歌手之外，亦有一啲管弦樂團（例如香港管弦樂團）有呢啲做法。雖然唔會有現場觀眾，但係喺表演期間，有啲歌手亦會睇住觀眾嘅網上留言，同佢哋互動。喺武漢肺炎疫情期間，呢種音樂會喺世界各地，包括香港、台灣同韓國，都變得比較流行。有啲音樂人仲會用埋AR、3D圖像技術加強音樂娛樂嘅效果。

武漢肺炎疫情期間

喺武漢肺炎疫情期間，有啲藝人就發起咗呢啲網上音樂會，為唔同受疫情影響嘅人打氣。

• 郭富城喺2020年5月搞過一個網上演唱會，為業界同香港人打氣。
• 2020年4月，全球公民（Global Citizen）同世界衛生組織發咗一個網上音樂會，去鼓勵前線醫務人員，同時為Covid-19 團結應對基金籌款，有100多位風靡世界嘅音樂界巨星參加。

商業模式考慮

有啲評論認為，呢啲網上演唱會，如果係免費睇嘅話，就算計埋贊助費用同埋後續原聲唱片嘅發售，網上演唱會可能都冇辦法收回成本。不過，呢啲網上演唱會仍然可以安撫歌迷，並且喺YouTube或者其他社交媒體吸納新嘅支持者。而美國串流媒體平台Livestream嘅調查報告亦指出，呢啲網上演唱會可刺激網民觀看其他現場表演嘅需求，有助帶動日後實體演唱會嘅銷售。