網球場係用嚟打網球嘅場地,長方形,可以喺室內或戶外,中間有高一米嘅網分隔雙方陣地。單打同雙打比賽都用相同樣嘅場地,但係單打用嘅區域會窄一啲。

網球場嘅尺寸

場地規格 編輯

  • 網球場長度無論單打定雙打都係長23.77米。濶度單打係8.23米,雙打係10.97米,雙打比單打濶2.74米。
  • 無論單打定雙打,網嘅高度:中央係91.4厘米,兩邊係1.07米。
  • 線嘅濶度,中央標誌同中央發球線係5厘米,其他線為可以係2.5至5厘米。

球場種類 編輯

草地場 編輯

草地球場係歷史最悠久、最具傳統意味嘅一種場地。草地場嘅特點係個波落地嗰陣同地面嘅摩擦細,波嘅反彈速度快,對球員嘅反應能力、靈敏度、奔跑嘅速度同技巧等要求非常高。因此,草地往往都係「攻勢網球」嘅天下,發球上網、隨球上網等各種上網強攻戰術幾乎被視為喺草地網球場上制勝嘅法寶,底線型選手就喺草地網球場上難有成就。但係,由於草地球場對草嘅特質、規格要求極高,加上氣候嘅限制同埋保養同維護費用昂貴,好難推廣到世界各地。

紅土場 編輯

紅土場屬於軟性球場,常見嘅各種沙地、泥地等都可以叫做軟性場地。呢種場地特點係個波落地嗰陣同地面有較大嘅摩擦,球速較慢,球員喺跑動路程特別係喺急停急回嘅時候會有好大距離,所以球員必須具備比喺其他場地上有更出色嘅體能、奔跑同移動能力同埋更頑強嘅意志品質。喺呢種場地比賽對球員嘅底線相持功夫係一個極大嘅考驗,球員一般要付出幾倍嘅汗水同耐心喺底線同對手周旋,獲勝嘅往往唔係打法兇悍嘅發球上網型選手,而係喺底線艱苦奮鬥嘅一方。

硬地場 編輯

現代大部分嘅比賽都係喺硬地網球場進行,亦係最普通、最常見嘅一種場地。硬地網球場一般由水泥瀝青鋪墊而成,上面有一層紅、綠色塑膠面層,硬地場表面平整、硬度高,波嘅彈跳非常有規律,但係波嘅反彈速度好快。好多優秀嘅網球選手認為,硬地網球更具「爆發力」,而且網球比賽中硬地球場佔主導地位。但係硬地冇其他質地嘅場地彈性好,地表嘅反作用強而僵硬,所以容易對球員造成傷害,而且呢種損害已經令到好多優秀嘅網球選手付出咗好大代價。

地毯場 編輯

地毯場嘅表面係一層可以移除嘅尼龍編織面或塑膠類物質,好似地毯一樣鋪設喺地下就可以成為一網球場,唔用嗰陣亦可以收起,通常用喺室內場館。地毯場波嘅彈跳速度最快,波嘅彈跳高度亦第二低,球員擊球準備嘅時間好少、好少時間去追嗰波。因此喺地毯球場,較易打出令到對手無法反擊嘅球。因此一般嚟講,侵略型底線型球員同發球上網型球員嘅打法喺呢種場地比較佔有優勢。

出面網頁 編輯