緊急疏散

緊急疏散（粵音：gan2 gap1 so1 saan3）定義係指「喺一笪地方有危險嘢（例如火燭或者有毒氣體泄漏呀噉）嗰陣，要笪地方嘅人有咁快得咁快移去安全地方」嘅相關工作。

電腦模擬

睇埋：個體為本模型

「緊急疏散要點做？」係唔少社會科學家關注嘅一個課題，對建築設計嘅安全考量嚟講亦好重要。

社會科學家好興用個體為本模型（ABM）研究人緊急疏散嗰陣嘅行為。佢哋會將每個人視為一個個體，當佢哋傾向會按某啲法則郁動，並且行個 ABM 睇吓「如果啲人按噉噉噉嘅法則郁動，佢哋走起火警上嚟會出現點嘅情況」。

例：2018 年火燭疏散 ABM 研究

喺 2018 年，有班科學家就做咗份研究，模擬一棟建築物火燭嗰時啲人嘅疏散情況，用 GAMA 平台嚟做模擬，個模型大致係噉嘅：

 設 $n_{1}$ 個人（evacuee），每個都具有：（1）
   位置值
   行為模型，個模型包括「聽到火警鐘響就會開始疏散」等嘅多條法則，仲有搵路演算法教佢郁動
   個值表示生命（potency），如果佢掂到火或者濃煙，生命值會跌，生命值變 0 佢就會死
   個值表示佢走得有幾快（speed）
   如果個人離開咗棟建築物，佢就算係安全
 設 $n_{2}$ 個火頭，每個都具有：
   （初始化嗰陣係隨機設定嘅）位置值
   個值表示佢擴散得幾快（propagation speed）
 設 $n_{3}$ 股濃煙，每個都具有：
   位置值
   會由火度產生出嚟
 設 $n_{4}$ 個火警鐘，每個都具有：
   位置值
   一個範圍，一旦有火或者濃煙進入佢嘅範圍，佢就會響
   個持久值，表示個鐘會響幾耐
 
 設 $t$（時間）= 0；（2）
 
 While 場模擬行緊，（3 同 4）
   Foreach 個體（包括人、火頭、濃煙同火警鐘）
     按個個體啲法則，更新佢嘅狀態
   $t$ 上升 1；（5）

一棟建築物嘅平面圖；想像棟建築物入面每個人都係幅平面圖上面嘅一點，識得按某啲法則郁動，噉火燭起上嚟啲人能唔能夠及時逃生呢？

有咗好似上述噉嘅模型，研究者就可以攞住好多唔同嘅建築物平面圖，試行個模型，解答「如果棟建築物嘅設計係噉噉噉，（假設啲人冚唪唥都會跟住啲法則疏散）火燭嗰陣會有幾多人死？」噉嘅問題。然後佢哋仲會同建築師等嘅人員合作－例如想像有班建築師要設計一棟建築物，佢哋諗咗好幾個方案出嚟，跟住就需要決定採用邊個方案；佢哋可以同每個方案都行一次模擬，模擬嗰套方案有幾安全（安全 = 火燭嗰陣死得人少），就可以幫手決定「邊套方案比較好」。

睇埋

• 建築設計，建築物嘅設計往往要考慮「發生危險嘢嗰陣，啲人容唔容易疏散」嘅問題。
• 走火警