美人 (位號)
美人，係古代中國、越南君王後宮妃嬪嘅一個等級。《漢書．外戚傳》話：「漢興，因秦之稱號，帝母稱皇太后，祖母稱太皇太后，適稱皇后，妾皆稱夫人。又有美人、良人、八子、七子、長使、少使之號焉[1]」，可以睇到，秦朝（或者更早）已經有「美人」呢個後宮嘅等級，「美人」嘅地位喺皇后之下。
《後漢書．皇后紀序》嗰度話：「及光武中興，斲雕為朴，六宮稱號，惟皇后貴人，金印紫綬，俸不過粟數十斛。又置美人、宮人、采女三等，並無爵秩，歲時賞賜充給而已[2]」，可以睇到同皇后、貴人唔同，當時嘅「美人」、「宮人」、「采女」係無正式嘅品位，只係過年過節嘅時候，得到一啲賞賜。清朝乾隆年間編嘅《欽定四庫全書．文獻通考卷二百五十四》嗰度話：「晉武帝采漢魏之制……其餘有美人才人中才人爵視千石以下……美人才人一十五員品正第四是為世婦[3]」，可以睇到漢朝同埋晉朝，美人係正四品，有千石以下嘅俸祿。
魏晉南北朝嘅時候，美人嘅地位低過九嬪，高過才人[3]。隋朝「美人」屬於世婦，地位低過婕妤，高過才人、寶林，仍然係正四品。
根據《新唐書．后妃上》，唐制嘅皇后之下，有四夫人、九嬪，然後係「婕妤、美人、才人各九，合二十七，是代世婦。寶林、御女、采女各二十七，合八十一，是代御妻[4]」，可以睇到唐朝嘅美人有九個位，地位低過婕妤，高過才人。《新唐書．后妃上》又話：「開元時，以後下復有四妃非是，乃置惠、麗、華三妃，六儀，四美人，七才人……[4]」，可以睇到唐玄宗李隆基開元年間，美人嘅人數後嚟減到四人。
五代宋遼金其間，沿用唐朝呢個制度，去到元朝就廢除咗美人呢個封號。元朝嘅後宮等級比較簡單，只設立皇后同妃子兩個等級，妃子嘅人數無規定。
明朝後宮妃嬪等級一般係皇后、皇貴妃、貴妃、妃、嬪，不過明代嘅嬪妃制度比較混亂，無統一嘅制度，每個皇帝都有好多新嘅嬪妃稱號。明朝皇帝用過嘅「散號」（非常設嘅位號）包括：婕妤、昭儀、昭容、貴人、美人等。如果計埋「散號」，明朝嘅妃嬪等級制度係：皇后、皇貴妃、貴妃、妃、嬪、婕妤、昭儀、昭容、貴人、美人。而明朝東宮，太子妃之下，設有才人、選侍、淑女三等。
清朝無設立美人嘅個位號。
主要人物
編輯- 許美人 (漢光武帝)
- 虞美人 (漢順帝)
- 王美人 (漢靈帝)
- 劉美人 (張駿)
- 田美人 (晉廢帝)
- 蔡美人 (宋文帝)
- 蔣美人 (南朝宋文帝)
- 楊美人 (南朝宋文帝)
- 泉美人 (劉友母)
- 蕭美人
- 紀美人 (唐憲宗)
- 晁美人 (唐宣宗)
- 徐美人 (宋真宗)
- 楊宗妙
- 欽慈陳皇后
- 高美人 (宋哲宗)
- 王美人
- 陳美人
參考
編輯- ↑ 〈漢書/卷097上 - 维基文库，自由的图书馆〉。zh.wikisource.org (中文)。喺2024-01-26搵到。
- ↑ 〈後漢書皇后紀論 - 维基文库，自由的图书馆〉。zh.wikisource.org (中文)。喺2024-01-26搵到。
- ↑ 3.0 3.1 〈文獻通考 (四庫全書本)/卷254 - 維基文庫，自由的圖書館〉。zh.wikisource.org (繁體中文)。喺2024-01-26搵到。
- ↑ 4.0 4.1 〈新唐書/卷076 - 維基文庫，自由的圖書館〉。zh.wikisource.org (繁體中文)。喺2024-01-26搵到。