美國海軍陸戰隊無聲操槍排

美國海軍陸戰隊無聲操槍排（英文：United States Marine Corps Silent Drill Platoon），係美國海軍陸戰隊一支由24人組成嘅步槍排，又叫做「行軍嘅24人」（The Marching Twenty-Four）。呢個部隊嘅職責係進行無軍樂團伴奏、無口令搭配而配合精準嘅獨特操槍表演，藉以展現陸戰隊嘅專業同紀律。

歷史

無聲操槍排響1948年創立，原本淨係舉行一次操演，但係因為受到熱烈迴響嘅緣故，呢個部隊好快成為咗華盛頓特區海軍陸戰隊軍營入面一支例行舉辦表演嘅隊伍。

操槍形式

操槍排嘅海軍陸戰隊員響表演嗰陣，會利用經過手工拋光、重成10.5磅、裝有刺刀嘅M1加蘭德步槍進行一系列嘅槍法表演，包括變換陣列隊形，或者班隊員順序噉將支槍旋轉拋出等等。

隊員選拔同培訓

操槍排隊員係由加州潘德頓營同北卡羅來納州勒瓊營嘅陸戰隊步兵學校中挑選學員，並且由軍營人員進行面試。凡係獲准入隊嘅學員，都會被分派去首都華盛頓特區嘅陸戰隊軍營，服為期兩年嘅儀隊兵役。除咗儀隊職責之外，其他嘅受訓項目都係同其他戰鬥單位嘅步兵聯合進行。而響兩年期限內，佢哋重會被送到維珍尼亞州匡提科基地入面嘅陸戰隊作戰發展司令部，增強步兵技巧。隊員甄選嘅基本條件係身高響5呎11吋至6呎11吋之間，並且體重響同身高者嘅中間值左右。

當操槍排隊員全部揀晒之後，便開始喺華盛頓訓練，並且去亞利桑那州嘅尤馬海軍陸戰隊航空基地完成年度巡迴；佢哋重會去美國其他地方表演，有時都可能會前往海外。