習得型失助

習得型失助（英文：learned helplessness）係一種學習現象，指一隻動物反覆經歷過避無可避嘅痛苦之後學識「反抗冇用」，而變到冇嗮心機做嘢。

當一隻動物，佢一而再再而三噉受到一個懲罰性嘅刺激（例：隻狗俾研究員擺喺一間房入面，房嘅地板定時定候會過電電佢，每次將會有電嗰陣都會有盞燈閃），而且無論佢做啲乜到避唔開呢個刺激（例：間房有道門，道門鎖咗，搞到隻狗點郁都走唔甩），通常隻動物會變得消極，唔再嘗試做任何嘢嚟避開個刺激（例：下次盞燈閃嗰陣，隻狗淨係企喺度唔郁，等受電嘅痛楚）－「學識」進入一種「無助」嘅狀態；而且進一步嘅研究仲發現，一隻動物進入咗習得性失助之後，就算下次俾佢有機會避開個刺激佢都會冇動力去行動（例：學到失助之後，隻狗就算下次盞燈閃嗰陣明明道門大開住，都照樣企喺度唔郁等受電嘅痛楚），變到好似冇嗮心機做任何嘢噉。

習得性失助嘅概念對精神醫學等嘅領域嚟講相當有用：有心理學家指出，習得性失助同某啲心理病嘅徵狀好相似，例如係抑鬱症或者物質濫用等嘅現象，往往涉及個病人喺重複噉遇到一啲令佢哋覺得無力嘅事之後，放棄嘗試解決問題，改為做一啲幫唔到手解決問題嘅行為（好似係靠吸毒同飲酒等嘅方法嚟逃避問題），所以對習得性失助嘅研究喺呢啲領域上係一個受重視嘅課題。

將隻狗擺入去實驗盒入面電佢嘅圖解；假如佢著住件緊嘅衫，令佢難以跳去安全地帶，佢通常會進入習得性失助嘅狀態。