習李體制

習李體制係中國共產黨嘅中央第五代政治體制，「習」指習近平，「李」指李克強。習近平接替胡錦濤做中共中央總書記，李克強接替溫家寶做國務院總理，成為第五代領導集體嘅領軍核心人物所以叫做「習李體制」。

習近平喺中共十七屆五中全會上面被增補做中共中央軍事委員會副主席，沿襲胡錦濤嘅接班方式，李克強就做中華人民共和國國務院黨組副書記、中央財經領導小組成員，又負責政府多項重要工作；加埋兩個領導人外訪嘅規格都達到國家元首同政府首腦級數，所以通常媒體猜測「習李」接棒「胡溫」基本無懸念。

2012年11月15日中共十八屆一中全會，習近平當選中共中央總書記、中央政治局常委（排名第一），李克強再入選中央政治局常委（排名第二），標誌住「習李體制」正式形成。

中共第十八屆中央政治局常務委員會委員人數精簡做七個，其他五個按次序排列分別係：張德江、俞正聲、劉雲山、王岐山同張高麗。根據退休年齡限制，如無意外，只有習李二人可以喺2017年中共十九大連任政治局常委。