耒耜
耒耜（粵語拼音：leoi6 zi6）係用嚟挖泥、翻土嘅農具。「耒」（粵語讀音：淚）係指農具嘅「柄」，「耜」（粵語讀音：字）係指農具嘅「刃」[1]。喺《孟子．滕文公上》：「……陳良之徒陳相與其弟辛，負耒耜而自宋之滕……」[1][2]，意思係「……陳良嘅徒弟陳相同埋細佬陳辛，帶住農具從宋國嚟到滕國……」，文章嗰度講嘅「耒耜」，就係「農具」。
中國神話傳說嗰度話，耒耜喺神農氏發明嘅一種簡單嘅挖泥、翻土嘅農具。《易經·繫辭》提及「包犧氏沒，神農氏作，斫木為耜，揉木為耒，耒耜之利，以教天下」[3]，意思係「伏羲死咗之後，神農氏興起，神農氏斬斷木頭做成耜（農具嘅刃），烤彎木頭做成耒（農具嘅柄），將耒耜（農具）嘅用法教俾天下嘅平民百姓。」《禮含文嘉》亦都提及，神農「……始作耒耜，教民耕種……」[4]，意思係神農氏「……先係整咗啲農具，然後教人點耕田、種植……」。
有種講法係：
耒係一支尖頭嘅木棍，加上一段短嘅橫樑，用嘅時候將尖頭插入泥裏面，然後用腳踩橫樑，令到木棍深入啲泥嗰度，然後用力將啲泥翻出嚟。改進咗嘅耒有兩個尖頭或者有慳力嘅曲柄。
耜嘅結構類似耒，但係將尖頭改成咗扁頭（叫耜冠），類似現代嘅鋤頭（Hoe）、鏟（Shovel），佢哋嘅材料從早期嘅木製，發展到石、骨同埋燒過嘅陶土。
《管子．海王》提及「耕者必有一耒、一耜、一銚，若其事立」[5]，意思係耒、耜、銚可能係三種唔同嘅農具。
耒耜嘅發明提高咗古代農耕嘅效率。喺商朝開始出現嘅犁，好可能係由耒耜發展出嚟嘅，所以犁有時會叫做耒或者耒耜。
《幼學瓊林．卷四．制作類》：「興貿易，制耒耜，皆由炎帝[1][6]」，意思係「神農氏神農氏時期，開始振興貿易，發明翻泥土嘅農具」。
參考
編輯- ↑ 1.0 1.1 1.2 〈耒耜〉。《中華民國教育部》。喺2024年3月9號搵到。
{{cite web}}: CS1 maint: url-status (link) - ↑ 〈孟子/滕文公上 - 維基文庫，自由的圖書館〉。zh.wikisource.org (繁體中文)。喺2024-09-02搵到。
- ↑ 〈周易正義/08.2 - 維基文庫，自由的圖書館〉。zh.wikisource.org (繁體中文)。喺2024-09-02搵到。
- ↑ 〈古微書 (四庫全書本)/卷17 - 维基文库，自由的图书馆〉。zh.wikisource.org (中文)。喺2024-09-02搵到。
- ↑ 〈管子 : 海王 - 中國哲學書電子化計劃〉。ctext.org (臺灣中文)。喺2024-09-03搵到。
- ↑ 〈幼學瓊林/卷四 - 維基文庫，自由的圖書館〉。zh.wikisource.org (繁體中文)。喺2024-09-02搵到。