聚龍村
(由聚龍古村跳轉過嚟)
聚龍村（粵拼：zeoi6 lung4 cyun1）係廣東廣州嘅一條村，舊底屬番禺縣崇文社（堡），而家屬荔灣區芳村沖口街道。清末開村，世居村民姓鄺。
聚龍村嘅亭同牌坊
史
編輯聚龍村村民姓鄺，原籍廣東台山縣蒼下村。清末，蒼下鄺氏族人鄺伍臣睇啱咗番禺縣崇文社大涌口附近笪地，同族人夾份買落，喺光緒五年（1879年） 開始起屋。有傳打樁嗰陣，紅砂岩層有水湧出來，風水佬就話呢個係「龍出血」，於是乎起名叫「聚龍」。
清代，聚龍村屬番禺縣茭塘司崇文社（堡）。中華民國時期，屬廣州市崇文區。1949年之後，屬廣州市芳村區。1954年， 屬廣州市芳村鎮。1961年，屬芳村區涌口街。1962年，屬廣州市郊區芳村道。1987年，屬芳村區涌口街。2005年，芳村區併入荔灣區，聚龍村屬荔灣區涌口街道聚龍社區，直到家時[1]。
佈局
編輯聚龍村係典型嘅梳式佈局，21座傳統民居排列整齊、方正，東西長117米，南北深63米。聚龍村外圍原先有3米咁高嘅牆，仲有東西炮樓，村口門樓上高嵌住清末進士姚沛寫嘅「聚龍村」匾。有一個書舍。村入邊有兩條大路、七條巷仔。路邊種花種樹，有石檯石凳[1]。
建築
編輯聚龍村民居嘅牆體、屋頂、影壁、水井、神樓同裝飾構建融合咗地域、政治、信仰、宗教、種族同藝術等等好多種文化元素。民居都係典型三間兩廊式廣府民居，坐北向南，磚木結構，硬山頂，碌灰筒瓦，青磚牆，花崗岩石腳。西邊係1914年新起嘅21號民居，自成一路。條村原先嘅21間民居，門牌聚龍村11號、15號嘅民居喺1930年代冧咗[1]。
攷
編輯連出去
編輯- 廣州聚龍古村，西關大屋外的另一種美 每日頭條
- 高樓大廈中的「老廣州」——聚龍古村 壹讀