臨江仙

臨江仙（粵音：lam⁴ gong¹ sin¹）係隻中調詞牌，雙調60字，有時句式、字數會變。原先係唐教坊曲，五代時確定格律同調式，牌下詞作大多寫傷春、別離苦恨、緬懷舊事。

遞啲名

有以下：

謝新恩（ze⁶ san¹ jan¹）：李煜用過呢個名。
雁後歸（ngaan⁶ hau⁶ gwai¹）：語出賀鑄「人歸落雁後，思發在花前」。
畫屏春（畫讀話，waa⁶ ping⁴ ceon¹）
庭院深深（ting⁴ jyun² sam¹ sam¹）
採蓮回（coi² lin⁴ wui⁴）：賀鑄用過呢個名。
想娉婷（娉婷讀乒庭，soeng² ping¹ ting⁴）：亦係賀鑄用名。
瑞鶴仙令（seoi⁶ hok⁶ sin¹ ling⁶）
鴛鴦夢（jyun¹ joeng¹ mung⁶）
玉連環（juk⁶ lin⁴ waan⁴）

典故

琴高

「臨江仙」呢隻詞牌嘅曲調原先係唐朝嘅教坊樂曲，呢支曲唱嘅係琴高呢位水中仙人，到五代時確立爲詞牌，啲人就從民間詞集《敦煌曲子詞》中一句「岸闊臨江底見沙」，幫佢起名做「臨江仙」。

據漢籍《列仙傳》，就話戰國時期有個人精通音律，善於撫琴，世人唔記得佢嘅本名，祇嗌佢做「琴高」。話琴高係修道之人，身懷長生不老之術，喺冀州、涿郡一帶遊歷兩百幾年。有朝一日佢心血來潮，想潛落涿江捉龍子，臨行前同弟子約咗相見日子時辰，要喺水邊裝香等佢。時辰一到佢騎住一條大鯉魚返咗來。喺陸上留咗個把月，又騎鯉魚返條江度，唔再現身人間。

李商隱有句詩，「水仙欲上鯉魚去，一夜芙蓉紅淚多」，講嘅就係呢個典故。

水仙子

湘妃竹

正因為曲調來歷同仙人相關，呢個詞牌創立之初所作嘅詞都同水仙相關，比如洛神、湘妃。

比如湘妃，相傳三皇五帝時，堯將自己兩個女娥皇、女英嫁畀繼位嘅舜。舜係明君，後來南巡時染沉痾而死，葬喺九嶷山（喺湖南永州），娥皇女英奔喪，見到係噉喊，啲眼淚留喺竹度，成為斑竹，又叫湘妃竹、淚痕竹。^[1]

後來晏幾道將呢隻詞牌搦去寫美人，將心思嘅歌女小蘋比作仙女，抒發自己嘅記掛，自此從北宋到南宋，「臨江仙」嘅作品唔再得修仙、靚女呢啲題材開始有抒發心緒、緬懷過去嘅作品。而家「臨江仙」詞作中最廣爲流傳嘅係明代文人楊慎嘅懷古之作，因為呢首詞氣象雄渾，重有一種對歷史興衰嘅超然，畀羅貫中揀做《三國演義》開場白，自此流傳出去。