自由民主黨 (德國)
自由民主黨（德文：Freie Demokratische Partei）係德國其中一個主要政黨，代表自由主義、中間派。由於德國嘅選舉制度，社民黨同基民盟通常要邀請自民黨入閣先組得成政府，所以好多時自民黨都扮演住「造王者」嘅角色，不過近年自民黨擔起呢種身份嘅機會已經少咗。佢喺2021年同社民黨同聯盟90/綠黨（綠黨）組成聯合政府。
歷史
編輯自由民主黨喺1948年成立。黨員好多係嚟自二戰前畀希特拉取締嘅德國人民黨（DVP）同德國民主黨（DDP）。1949年嘅西德第一次大選，自民黨就同基民盟一齊執政。直到1957年，基民盟同基社盟單獨過半，自民黨就冇入政府。1961年，基民盟議席又唔過半，自民黨又入返政府。到1969年，自民黨改同社民黨組政府，結束咗基民盟自西德開國以嚟成20年嘅統治。
1982年，自民黨退出聯合政府，社民黨只好以少數政府嘅形式運作，後來國會通過由基民盟提出，對當時總理施密特嘅不信任投票，提早大選。之後自民黨同基民盟嘅聯盟喺大選贏咗，佢哋一齊執政到1998年。
2009年，基民盟同自民黨第三次合作。到2013年，自民黨受到滅黨式打擊，由於比例得票唔夠5%，喺國會一席都分唔到。2017年嗰時，自民黨至可以重返國會。