花尾渡
花尾渡（粵拼：faa1 mei5 dou6*2，又寫花尾艔）係20世紀20年代到80年代珠三角地區內河主要嘅水上交通，呢種木船本身無動力，靠前面嘅機動船拖住行，所以又叫拖渡（to1 dou6，又寫拖艔），又因為部船裝飾得好靚，係當時廣東特有嘅河上風景，所以叫花尾渡。曾經係珠江航運嘅主力，後來畀鋼殼動力船取代。
樣
編輯呢種船好大隻，木造，個樣似畫舫，船上嘅樓高3層，上層係餐樓，係一等艙；中層叫公艙，係二等艙；下層同船頭係貨艙。部船裝飾華麗，雕欄畫棟，尤其船尾裝有彩光燈管，夜晚着燈時好靚，因此叫佢花尾，可謂係當時嘅河上宮殿。
_Emil_Rusfeldt_(RESTORED)_(4105450146).jpg)
部船容量好大，大部啲嘅可載客三四百人，細部嘅可裝一兩百人，可載幾十噸貨。佢嘅特色係無動力艙，全靠前頭嘅火輪（俗話叫溫底）拖住，因而部船無噪音、唔震、穩，瞓覺時好舒服，呢點得人鍾意，不過因為係拖渡，所以行得慢，啲客可能會煩、悶，所以啲船運公司會請啲藝人上去為乘客表演。亦因為自身無動力，所以抗風差。
史
編輯嶺南三江貫通，河道縱橫，舊時未通鐵路高速路，渡船就係主要嘅交通工具，航運好發達。行公路嘅話，有時去個地方要過幾次海。比如當時坐車從廣州到湛江，要經南海九江沙口渡同順德龍江渡，停車過海就好嘥時間，而西江係嶺南黃金水道，可以直通廣西，所以啲人就坐船去地方。
船原先係靠槳或帆驅動，後來出現腳踏船，稱為車渡。道光十年（1830），廣州水域出現咗第一條以蒸汽機為動力嘅英國福士號商船，外國商船開始一個個入來廣州水域度營運。廣東航商受新船吸引，喺咸豐五年（1855）購買美國造嘅「威拉特」 、「星火」、「金髮」 3條輪船，懸掛美國旗航行於省河（珠江廣州地區河段）一帶營運，史稱「詭寄」經營。
光緒末年，火船仔（火輪）傳入廣東，開始越來越多渡船用火輪拖。光緒三十四年（1908年），航商譚禮庭改造大型車渡，將渡船嘅腳踏裝置拆咗，改為平底船，然後按畫舫來整部船，是為鳳尾渡，清末民初時部船越整越豪華，設有華貴廂房、餐廳、浴室、獨衛，演變成花尾渡。
光緒三十四年，廣州永成航業公司就喺廣州去梧州嘅航線第一次用咗花尾渡。華僑出埠，可以揀搭花尾渡到香港，再轉郵輪出埠（中山石岐1918年就有咗恆昌、利盛號每日去香港）。
1920年代尾花尾渡成咗珠江下游主要客船，1945年後係花尾渡鼎盛時代，以廣州為中心，大小花尾渡行喺梧州、肇慶、江門、三埠、石岐五大航線。到1947年共有40幾條花尾渡（營運），製造工藝同性能都好掂。
最出名嘅花尾渡係廣州到三埠嘅新行利渡，係最大最靚嘅，譽為內河皇后，當時呢條航線上嘅人都首選搭呢部船，後來改名做曙光401渡。
花尾渡抗風差，有安全隱患。1980年2月27號凌晨，曙光401號喺開平單水口以西5公里嘅潭江河面遇強風翻船，死難301人，同年11月26號，廣西桂民301於平南丹竹遇風翻沉，死100人。自呢啲沉船後，花尾渡逐漸為鋼殼船取代。
拍拖嘅典故
編輯因為花尾渡係拖船，每次埋岸離岸都要拍拖一次，就係埋岸時火輪減速，船工鬆開牽引繩，花尾渡就靠慣性拍到拖船上，船工再綁好兩部船嘅繩，拖船發力𢶜（ngung5）去碼頭，是為「拍拖」。後來見男女拖手仔一如兩部船拍埋拖行，於是就將戀愛成為拍拖。