英格蘭飲食

英格蘭飲食（英文：English cuisine）係指英格蘭嘅飲食文化。英格蘭飲食有佢嘅獨特特徵，並喺大英帝國時代受到北美、中國、印度等地入口食材嘅影響。英格蘭有代表性嘅街頭食品有炸魚薯條等。喺英格蘭，印度菜、中國菜、泰國菜、意大利菜同法國菜都幾受歡迎。同時英國都係較早接受美國快餐文化嘅國家。根據英國芝士委員會嘅統計，英格蘭有700種以上嘅芝士^[1]。英格蘭嘅芝士大部分比較硬，用咗牛奶製作。英格蘭嘅芝士中最出名嘅係車打芝士。英格蘭人每日由朝到晚嘅飲食有早餐、上午茶、早午餐、午餐、下午茶、晚餐同宵夜。除咗屋企同餐館外，酒吧同外賣店都係英格蘭人重要嘅飲食場所。英格蘭係歐洲少數紅茶比咖啡受歡迎嘅國家。喺酒精飲料方面，英格蘭最受歡迎嘅酒精飲品係啤酒。另外雖然產量好少，英格蘭都係葡萄酒生產國。