英皇集團係香港生意人楊成創立嘅公司,旗下業務橫跨唔同界別。

業務

金融業務

英皇集團嘅金融業務係集團嘅主營業務,英皇金融證券集團[1]旗下分行數目係同行之冠,並已經喺澳門同東南亞建立業務。旗下包括專營外匯買賣業務嘅英皇金融集團(香港)有限公司[2]同埋從事黃金兼貴金屬買賣服務嘅英皇金業投資(亞洲)有限公司。而集團亦都一早喺1990年將業務擴展到澳門,成立咗英皇金融集團(澳門)有限公司[3]。英皇證券集團[4]就專營證券及期貨經紀業務,旗下英皇證券(香港)有限公司同埋英皇期貨有限公司代客買賣喺香港同埋多個海外金融市場掛牌嘅股票、債券、基金、期權連衍生產品。為提供更全面嘅一站式理財服務,亦設立咗另一附屬公司英皇財富管理有限公司。另外,集團亦向企業提供各類融資安排嘅專業意見,亦有財務貸款服務。英皇證劵集團喺2007年4月喺香港聯合交易所主板上市(香港股票編號717)。

地產業務

英皇集團(國際)(股份代號:163)負責地產業務,1990年上市,係英皇集團核心業務之一。為咗落實集團多元化發展策略,英皇集團(國際)不斷努力發展、投資同埋管理各類型地產項目。項目咩嘢都有,包括大型綜合發展項目、寫字樓、購物商場、住宅、酒店,同埋共享工作空間等等,分佈喺香港、澳門同埋中國各個主要城市。[5]當中大多位處喺全球著名地段,包括香港羅素街、北京長安街、同埋倫敦牛津街等等。其項目包括淺水灣「the pulse」、「南灣御苑」、舂坎角「御濤灣」、大埔嘅低密度住宅大樓「龍成堡」同「映月灣」、 西營盤「維港峰」、長沙灣「喜遇」同屯門「珀居」等等。公司亦買入倫敦牛津街181-183號全幢商廈做投資,拓展海外市場。旗下嘅北京英皇集團中心更獲得由北京商務中心區管理委員會頒發 「六星超甲級樓宇」同「中國寫字樓金地標」殊榮。

鐘錶珠寶

英皇鐘錶珠寶[6]係集團嘅基石業務,2008年7月喺香港聯合交易所上市(香港股票編號887)。經過多年發展,而家已經喺國際享負盛名,分店佈滿香港、澳門各購物旺區,專門代理世界一級嘅鐘錶品牌,好似勞力士卡地亞百達翡麗伯爵歐米茄等。而喺珠寶鑽飾方面,英皇鐘錶珠寶獨特用心嘅設計,贏盡國際口碑,奠定咗喺亞洲珠寶界嘅地位。2009年又喺尖沙咀嘅歷史建築物「1881」成立第一間珠寶旗艦店。2013年一度衝出國際,喺新加坡連開四店。2018年,業務更打入馬來西亞。

娛樂

英皇集團喺九十年代陸續成立英皇娛樂集團(1999年)、英皇電影、以及英皇戲院,全面投入文化創意產業,迄今累積電影、電視劇集、音樂唱片、演唱會、舞台劇等唔少作品,旗下多位藝人揚名國際,多個周刊品牌風行線上線下。後來又拓展電影院業務,貫通成個電影行業嘅產業鏈。至2017年,英皇文化產業集團有限公司(股份代號:491)正式成立,並喺香港聯合交易所主板上市。

酒店

英皇集團旗下而家有嘅酒店包括位於澳門嘅英皇娛樂酒店、香港灣仔嘅英皇駿景酒店,同埋澳門嘅盛世酒店,另於香港經營兩間服務式住宅MORI MORI同埋The Unit。

傳媒

英皇集團旗下嘅新傳媒集團喺1999年成立,從事出版同埋發行,每星期出版唔同刊物,五本刊物分別係《東方新地》、《新假期》、《新Monday》同埋《經濟一週》。隨著免費報章出現,傳統報章近年嘅銷量大幅下降,加上讀者讀報習慣有所改變,《新報》長期處於虧蝕狀態,決定2015年7月12號起停刊,所有受影響員工都獲合理賠償同埋妥善安排。

新傳媒喺本地同埋國際比賽中都拎到機構頒授獎項,如Galaxy Awards、Astrid Awards、「亞洲出版大獎」同埋「傳媒轉型大獎」,又喺Marketing Magazine Spark Awards for Media Excellence卓越傳媒大獎2017中橫掃一共33項大獎,包括全場兩個最高榮譽大獎 Media Brand of the Year「年度最佳媒體品牌大獎」同埋 Media Owner of the Year「年度最佳媒體」。

傢俬及室內佈置

歐化傢俬喺1975年成立,專門代理歐洲嘅高級傢俬,為歐化國際有限公司(股份代號:1711)所管轄。歐化傢俬網羅大量風格時尚、舒適耐用嘅品牌,零售門市遍佈香港咁多區。除咗零售之外,又透過旗下唔同品牌將業務作多元化發展,包括從事床褥、梳化同埋床品批發同零售嘅歐化寶、主打優質輕巧傢俬同埋丹麥潮流家品嘅 at.home,以及承接傢俬工程項目嘅Special Project,提供一站式家用同埋商用傢俬配套服務同產品。

參考

  1. "英皇金融證券集團". 原著喺2016年3月4號歸檔. 喺2015年1月28號搵到.
  2. "英皇金融集團(香港)有限公司". 原著喺2016年3月4號歸檔. 喺2015年1月28號搵到.
  3. "英皇金融集團(澳門)有限公司". 原著喺2016年3月4號歸檔. 喺2015年1月28號搵到.
  4. 英皇證券集團
  5. 英皇地產
  6. 英皇鐘錶珠寶