英雄聯盟

英雄聯盟（League of Legends，縮寫LoL，簡稱League）係一隻由Riot Games開發同發行嘅5打5線上戰鬥遊戲（MOBA），喺2009年發行，有 Windows 版同 MacOS 版。最初嘅概念係嚟自《魔獸爭霸III：寒冰霸權》入面一個叫 Defense of the Ancients（簡稱 DotA）嘅第三方自定義地圖，後嚟發展成為一款獨立遊戲。佢係一隻免費game，不過有得貨金買skin。

英雄聯盟
2019年起嘅遊戲圖示
類型	MOBA
平台	Microsoft Windows OS X
整	拳頭遊戲
發行	拳頭遊戲
制作人	Jeff Jew
總監	Andrei van Roon
編劇	Graham McNeill
模式	Multiplayer
發行日期	Microsoft Windows October 27, 2009 OS X March 1, 2013

喺一場遊戲入面，十個玩家分成兩隊對戰，佢哋要守自己嗰半邊地圖並攻佔對面嗰半邊。每個玩家各自操縱一個角色（叫做英雄），每個英雄都有自己唔同嘅技能。遊戲進行期間，英雄可以獲取經驗值升級同埋獲取金幣去買裝備，去強化自己，打敗敵隊。遊戲嘅勝利條件係摧毀敵隊一棟叫「主堡」（Nexus）嘅建築物。

英雄聯盟嘅評價普遍正面，主要嘅批評係無法處理玩家喺遊戲內嘅負面、不良行為，Riot曾經多次改革遊戲入面嘅玩家不當行為舉報系統，但係都無辦法令玩家嘅一啲負面行為，例如辱罵隊友、搶路、偷小兵、偷野怪呢啲toxic嘅行為得到懲罰。喺2019年，英雄聯盟曾經錄得八百萬玩家同時上線嘅紀錄，遊戲嘅成功衍生出其他相關嘅作品，有MV、漫畫、短篇故事同埋動畫奧術（Arcane），亦都有其他電子遊戲，包括英雄聯盟：激鬥峽谷、符文之地傳奇、破敗王者：英雄聯盟傳奇等等。

英雄聯盟好多時被形容為世界上最大嘅電子競技遊戲，每年一度嘅英雄聯盟全球總決賽由十二個賽區組成，喺2019年嗰屆有超過一億人收睇，同時收睇人數曾經高達四千四百萬，比賽有喺網上直播平台Twitch、YouTube、Bilibili同埋有線電視運動頻道ESPN播出。

玩法

英雄聯盟係一隻isometric視角嘅MOBA遊戲，玩家控制一隻有特殊能力嘅角色（英雄）去對戰。截至2021年11月，總共有157隻唔同嘅英雄畀玩家揀。遊戲期間，玩家可以透過擊殺敵隊「小兵」、英雄、摧毀敵隊建築物同擊殺中立「野怪」獲取金錢同經驗值。金錢可以等英雄返到基地嗰陣用嚟買裝備強化自己，經驗值就可以用嚟升級英雄，提升英雄能力同埋提供技能點數，用嚟升級技能。每場遊戲之間係分開嘅，一場入面所得金錢同經驗值帶唔到去下一場遊戲。

一般模式：召喚峽谷

簡化咗嘅召喚峽谷地圖，黃色嘅係所謂嘅「路」（lane），由電腦控制有簡單智能嘅小兵會沿呢三條路進攻。紅點同藍點代表防禦塔。深紅同深藍嘅叫做「溫泉」。黑色虛線代表河道。綠色係野區，入邊有中立野怪。

召喚峽谷係英雄聯盟嘅主打地圖，亦都係電子競技入面採用嘅地圖。喺呢個地圖有唔計積分嘅一般模式，同計分嘅積分對戰模式，積分對戰再細分「單排/雙排」同「彈性積分」兩種。積分模式採用ELO計分系統，分為九個階級（叫做牌位），由低至高分別係鐵牌、銅牌、銀牌、金牌、白金、鑽石、大師、宗師同菁英。

一般模式嘅地圖係正方形，兩隊分別喺左下角同右上角開始，邊隊首先打爆對面主堡就贏，沿途每條路都有三座防禦塔守護，敵隊嘅英雄亦都會嘗試阻撓。

英雄

内文：英雄聯盟英雄一覽

Fans cosplay 英雄聯盟入邊嘅英雄奈德麗

而家英雄聯盟有超過140隻英雄畀玩家揀，而且每幾個月就推出一隻新嘅，不過有啲英雄就歷久彌新，例如犽宿、劫、李星呢啲考技術嘅，就幾時都咁多人玩。

睇埋

• 多人線上戰鬥競技場遊戲