草本植物

  「草」跳轉到呢度。想搵其他用法，請睇「草 (搞清楚)」。

草本植物（粵拼：cou2 bun2 zik6 mat6；英文：herbaceous plants）係指一啲梗裡面木質部（英文：Xylem）唔太發達，或者係無木質化嘅植物。因為呢種植物嘅木質化細胞比較少，所以啲梗嘅質地比較柔弱，支持力亦都比較弱。大部分嘅草本植物都比較矮同埋細，壽命亦都比較短，多數會喺生長週期完咗之後就會死。有啲草本植物死咗之後，第二年嘅春天，會返生。草本植物可以係一年生、二年生同埋多年生。同草本植物相對應嘅概念就係木本植物，啲人通常叫草本植物做「草」，同埋將木本植物叫做「樹」。

羅勒係草本植物

生長週期

大多數草本植物都係多年生（大約佔85%）但係亦都有啲係一年生（大約佔15%）或者係二年生（佔少於1%）。一年生植物係生長季節結束嘅時候或者開花結果之後，就會死，然後散落喺周圍嘅種子喺新嘅一年會發芽、生長。草本多年生同埋二年生植物嘅梗可能會喺第一年嘅生長季節結束嘅時候死咗，但係植物嘅根未死，所以會喺下一個生長季節生返。

新一年嘅時候，有啲草本植物可以從保留喺地上或者地下嘅活組織重新生出嚟，包括根、梗（梗喺地面上嘅加厚部分）或者係各種類型嘅地下梗，例如球莖、匍匐莖、根莖同塊莖等。常見嘅一年生植物包括小麥、稻米、番茄、粟米、花生、南瓜、向日葵、大豆、茄子等等。二年生草本植物嘅例子包括紅蘿蔔、防風草同埋常見嘅菊花；多年生草本植物包括薯仔、辣椒、牡丹、薄荷、洋葱、大多數嘅蕨類植物同埋大多數嘅禾本科植物。