莉迪芝雅王后

(由莉迪斯雅王后跳轉過嚟)
呢個人物係用緊西班牙人名:首姓或者父姓(即老豆個姓)係「柯蒂斯」,次姓或者母姓(即阿媽個父姓)係「奧卡素拉羅」。

莉迪芝雅王后西班牙文Letizia1972年9月15號—),全名莉迪芝雅·柯蒂斯·奧卡素拉羅西班牙文Letizia Ortiz Rocasolano)係現任西班牙國王菲臘六世嘅王后。前身係記者,係西班牙史上第一位平民出身嘅王后。

莉迪芝雅王后
2019年
西班牙王后
在位2014年6月19號—
前任蘇菲亞王后
私人明細
配偶阿隆素·加偉羅
(1998年結婚;1999年離婚)

菲臘六世
(2004年結婚)
仔女莉安諾公主
蘇菲亞王女
全名Letizia Ortiz Rocasolano
出世 (1972-09-15) 1972年9月15號(51歲)
西班牙 西班牙奧維耶多
莉迪芝雅王后嘅簽名

生平 編輯

 
2003年,當時係王儲嘅菲臘六世同莉迪芝雅第一次出席公開活動

莉迪芝雅王后1972年響阿斯圖里亞斯首府奧維耶多嘅一間療養院出世,老豆Jesús José Ortiz Álvarez係記者,而阿媽María de la Paloma Rocasolano Rodríguez就係護士;莉迪芝雅係屋企大女,下有兩個細妹。後嚟老豆阿媽響1999年離婚,老豆亦再結婚。

阿爺José Luis Ortiz Velasco係一個商業工作人;阿嫲Menchu Álvarez del Valle係阿斯圖里亞斯一位好出名兼老牌嘅播音員,攞過唔少獎。阿公Francisco Julio Rocasolano Camacho係一位的士司機同埋機械維修技工,有法國奧克人血統;而阿婆Enriqueta Rodriguez Figueredo就係菲律賓同西班牙混血。可以見到,莉迪芝雅有西班牙、法國、奧克同菲律賓血統。

莉迪芝雅先後入讀La Gesta School同埋Ramiro de Maeztu High School。高中畢業之後,佢響馬德里康普頓斯大學攞到新聞系學士學位,之後又響Institute for Studies in Audiovisual Journalism攞到碩士學位。返大學嗰陣,佢曾經響ABC報、La Nueva España(中文:阿斯圖里阿斯嘅日報)同埋埃菲社做嘢。大學畢業後佢去到墨西哥瓜達拉哈拉,曾經響Siglo 21日報做野。不過無耐佢就返到西班牙,又響彭博電視經濟頻道西班牙版同埋CNN+做過野。

1998年,佢同已經拍咗拖十年嘅作家、兼佢嘅高中老師阿隆素·加偉羅(Alonso Guerrero Pérez)結婚,但係結咗婚一年幾就散咗。

2000年,佢轉到西班牙國營頻道做嘢,負責報導二十四個鐘新聞,之後開始響一啲節目上面做主持或者主播。2003年,佢得到咗升職,轉為報導晩間新聞「Telediario 2」,呢個節目係全西班牙收視率最高嘅新聞節目,令到佢開始有名。響任內,佢曾經報道過唔少國際大事,包括2000年美國總統大選、九一一同埋伊拉克戰爭,其中佢仲響九一一現場直播。

2002年,佢識咗當時係王儲嘅嘅菲臘六世,兩個人好快就開始拍拖。2003年11月,王室響萬聖節嗰日宣佈佢哋訂婚嘅消息,震驚西班牙人,因為佢哋完全唔知兩個人嘅情侶關係。菲臘皮以一隻十六克嘅鑽石戒指成功求婚;而莉迪芝雅就送返佢鑲咗藍寶石嘅白金袖扣同埋一本書。

2004年兩個人結婚,響阿爾穆德納教堂搞婚禮,好多名人都有出席。婚後,莉迪芝雅畀人封為「阿斯圖里亞斯親王妃」。佢哋生咗兩個女:大女莉安諾,同埋二女蘇菲亞

2014年6月19號凌晨0點0分,老公繼位做西班牙國王,係菲臘六世,而莉迪芝雅亦跟住升為王后,係西班牙史上第一位平民出身嘅王后。

軼事 編輯

2018年,王室成員同埋前國王兩公婆齊齊出席復活節公開活動,三代同堂。期間,蘇菲亞王后似乎想同兩個孫女莉安諾蘇菲亞影張相,但係畀莉迪芝雅王后阻止,兩婆媳於是乎就響到爭拗,甚至有少少推撞。大女莉安諾想做「和事佬」但係失敗,搞到菲臘六世要嚟勸交[1]。雖然西班牙國內幾乎一面倒支持蘇菲亞王后;不過莉迪芝雅王后嘅前同事就話,王后無非都係想保護兩個女先至咁做[2]

編輯

  1. 中時新聞網. 眾翻臉 西班牙王后與太后公開罵街 國王好尷尬 - 國際. (中文). 喺2021-07-08搵到.
  2. HK, ELLE. 西班牙王室都有婆媳糾紛!民眾齊撐奶奶Queen Sofia民王后Queen Letizia | ELLE HK. www.elle.com.hk. 原著喺2021-07-09歸檔. 喺2021-07-08搵到.