葛柏
(由葛柏案跳轉過嚟)
彼德·菲茨萊·葛柏（英文：Peter Fitzroy Godber，1922年4月7號—？）係一名英國籍退休香港總警司及貪污犯。
| 彼德·菲茨萊·葛柏 （Peter Fitzroy Godber） | |
|---|---|
 | |
| 出世 | 1922年4月7號 英國倫敦 |
| 死 | ？ |
| 國籍 | 英國 |
| 職業 | 香港警察 |
| 出名原因 | 貪污 |
葛柏在1952年加入香港警隊做見習督察，1955年升任助理警司，1966年升任高級警司，1969年晉升做總警司。佢多年來喺警隊表現突出，喺六七暴動期間立過大功，屢獲英國朝廷嘉獎。不過，葛柏事實上多年來運用自己嘅職權大肆斂財，涉及貪污款項超過430萬港元。東窗事發之後，葛柏潛逃英國。由於英國無香港《防止賄賂條例》裡邊「收入與官職不相稱」爾個罪名，以致香港政府一時間引渡唔到葛柏返香港受審。
葛柏事件引起巨大民憤，民間更加發起「反貪污、捉葛柏」運動，一方面促請港府儘快捉葛柏返香港，一方面又要求正視香港嘅貪污問題。事件最後促成廉政公署喺1974年2月正式成立。廉政公署成立之後嘅第一項任務就係要緝捕葛柏歸案。經過深入調查之後，廉署發現葛柏曾涉嫌收受華籍警司鄭漢權25,000港元賄款，以安排對方出任灣仔區警司。掌握充分證據之後，葛柏終於喺1974年4月喺佢嘅英國住所被當地警方拘捕，喺1975年1月被廉署人員押返香港。同年2月，葛柏被法院裁定一項串謀貪污同一項受賄罪罪名成立，判監四年，以及充公25,000港元賄款。
服刑兩年幾之後，葛柏喺1977年10月獲准提早出獄，之後全家移居西班牙，以逃避港府循民事途徑向佢追討400幾萬港元嘅貪污款項。葛柏一家後來重隱姓埋名，銷聲匿跡，至今下落不明，追討貪污款項一事成為懸案。
出面網頁
編輯
 |