葡京人綜合渡假村

  想搵第二個意思嘅話，請睇葡京 (搞清楚)。

澳門葡京人（Lisboeta Macau）係澳門主題公園渡假村股份有限公司喺澳門路氹城起嘅大型度假村，近澳門東亞運動會體育館同上葡京，佔地10.6萬平方米，總建築面積有14.1萬平方米。曾先後提出起Jockey Club Hello Kitty主題樂園。項目經多次延後同更改，項目喺2018年8月平頂，其後公佈項目名為葡京人綜合渡假村。董事何猷亨表示呢幾年嚟澳門落成嘅主題度假村欠缺澳門經典元素，呢個項目希望以新形式延續澳門人嘅集體回憶，重塑澳門面貌。

由2020年12月20號開始，借出酒店畀政府作為「自選醫學觀察酒店」提供有需要人士自費入住，喺借用為「自選醫學觀察酒店」期間，葡京人酒店嘅餐飲、零售同娛樂項目將唔會對外開放。原本打算同澳博嘅上葡京一齊喺2020年開幕，但係兩者都因為武漢肺炎而要延長至2021年初先開幕。

2021年6月23號，澳門主題公園渡假村有限公司透過新聞稿表示，7月17號開始部分設施將會率先開放。

此架步現時冇賭場，將來可能會開翻間。

結構

度假村大樓有12層高，設有三個酒店品牌，提供合共820間客房。包括葡京人酒店、全球首間以LINE FRIENDS作為主題嘅酒店和全球第一間L'OCCITANE酒店。而建築細節會參考澳門嘅經典建築物，例如愛都酒店、皇宮娛樂場同新中央酒店等。

葡京人酒店

以現代風格設計呈現1960年代澳門舊風貌，設有574間客房。

受武漢肺炎影響，由2020年12月19號起，呢間酒店畀澳門政府作為自選醫學觀察酒店之一。

LINE FRIENDS 主題酒店

LINE FRIENDS主題酒店提供82間客房同套房，分為3種唔同特色嘅主題客房，包括「LINE FRIENDS主題房」、「BROWN主題房」同「CONY主題房」。

L'OCCITANE 酒店

全球第一間以國際出名天然護理品牌L'OCCITANE為設計藍本嘅主題客房，設有164間客房同套房，以品牌嘅發源地—法國南部普羅旺斯作為設計主題。

設施

購物商場設有100間商店，有仿舊葡京外觀嘅「鳥籠」裝飾，牆身以LED燈點綴住澳門獨特風景，展現出新穎澳門印象，又以戶外懷舊街景同室內未來場景為主題，另外亦設有全球首個結合震撼視覺元素，全長388米長，一共設有5條滑翔道嘅高空滑索、12米高嘅室內跳傘館Indoor Skydiving同埋集IMAX影院同MX4D影院，合共9間影院提供大約1,200個座位嘅英皇戲院等。

澳門皇宮

「澳門皇宮」參照當年第一艘以「賊船」成名嘅「皇宮娛樂場」而建設，呈現中國宮廷氣派。