蒙巴頓家族

蒙巴頓家族（英文：Mountbatten）係英國一個貴族，德國黑森巴騰堡家族嘅分支。依家阿頭係佐治·蒙巴頓。

蒙巴頓家族
貴族
起源家族	巴騰堡家族
發源地	黑森大公國
創立年	1917年7月14號 (1917-07-14)
現任阿頭	佐治·蒙巴頓
銜頭	現存： 米爾福德黑文侯爵 緬甸蒙巴頓伯爵 已冇咗嘅： 卡里斯布魯克侯爵
有關成員	第一代米爾福德黑文侯爵路易·蒙巴頓 愛丁堡公爵菲臘親王 瑞典王后路易絲·蒙巴頓 第一代緬甸蒙巴頓伯爵路易·蒙巴頓
有關家族	黑森王朝 格呂克斯堡王朝 伯納多特王朝 溫莎王朝
旁支	蒙巴頓-溫莎

發源

蒙巴頓家族係德國黑森巴騰堡家族嘅分支。巴騰堡家族係黑森－達姆城王朝嘅分支。1851年，黑森大公國嘅亞歷山大王子同波蘭軍官個女茱莉亞·郝克結婚，因為佢哋係貴庶通婚，所以佢哋嘅後人冇黑森大公國嘅繼承權。同年，亞歷山大王子嘅大佬路德維希三世封茱莉亞·郝克做「巴騰堡女親王」，係根據巴騰堡呢個鎮嚟改嘅。

響1858年，巴騰堡家族嘅仔女獲得咗「王子」同「公主」嘅稱號。但由於「巴騰堡親王」呢個銜頭冇傳承性，即呢個銜頭只係茱莉亞·郝克可以有，佢嘅後人冇得繼承。

歷史

亞歷山大王子同茱莉亞·郝克嘅兩個仔，海因里希同路克維希，都同英國王室女仔結婚：海因里希嘅老婆碧翠絲公主，係維多利亞女皇細女；而路克維希嘅老婆維多利亞公主，就係維多利亞女皇外孫女。路克維希亦加入英國海軍，後嚟仲做咗第一海務大臣。

響一戰期間，英國嘅反德情緒好高，路克維希響英王佐治五世嘅建議下，就響1917年7月14號將家族姓由「巴騰堡」（德文：Battenberg）英文化做「蒙巴頓」（英文：Mountbatten），佢亦將自己個名由「路克維希·巴騰堡」英文化成「路易·蒙巴頓」，希望通過咁樣嘅方式嚟同德國人劃清界線，從而得到市民支持。路克維希仲放棄咗本身有嘅德國貴族銜頭。為咗補償返路克維希，佐治五世就封佢做米爾福德黑文侯爵、麥地那伯爵（英語：Earl of Medina）同埋奧爾德尼子爵（英語：Viscount Alderney）。

路易·蒙巴頓嘅二仔路易，畀人封做「緬甸蒙巴頓伯爵」。而佢嘅侄仔亞歷山大·蒙巴頓，就畀人封為「卡里斯布魯克侯爵」。

1947年，路易·蒙巴頓嘅外孫希臘王子菲臘（父系係格呂克斯堡王朝），同英國時任王儲伊利沙伯結婚。菲臘放棄咗丹麥同希臘嘅王位繼承權，就跟阿公路易·蒙巴頓嘅姓。1960年，伊利沙伯二世頒佈咗一道樞密院御令，決定後人嘅姓係「蒙巴頓-溫莎」。