蒙恬

蒙恬（大約前250年—前210年）係秦代將軍，以改良毛筆而出名。

秦始皇二十六年，蒙恬帶領秦軍攻打齊國，打贏齊軍，之後做內史。

前215年，秦朝派蒙恬帶兵30萬人攻打匈奴。

前212年，秦始皇派扶蘇去蒙恬度監軍。

蒙恬細佬蒙毅以前得罪咗趙高，搞到趙高對蒙氏兄弟懷恨在心。前210年，秦始皇過身。趙高夾埋李斯立胡亥做太子，跟住整封書信作啲罪名，派使者帶去蒙恬同扶蘇度，叫佢哋兩個自殺。蒙恬覺得可疑，唔肯自殺，就畀使者韞咗喺陽周度。胡亥知道扶蘇死咗之後，就想放過蒙恬，但係趙高唔想放過蒙氏兩兄弟，仲講掂胡亥韞埋蒙毅。到咗胡亥正式繼位做二世皇帝之後，趙高就係咁對住胡亥講蒙氏兩兄弟嘅壞話，而胡亥最後都係決定要殺蒙恬同蒙毅，最後蒙恬就被迫服毒自盡。