蛇王滿

蛇王滿係一間原喺廣東省廣州市荔灣區嘅風味蛇餐館，試過譽滿省港澳，原門牌漿欄路41號。老鋪由廣東南海大瀝人吳滿喺1887年創立，初址城西新基正中約，命名蛇王滿，係廣州第一間專營蛇類製品嘅店號，主打自製蛇膽陳皮米酒、蛇膽川貝末酒、三蛇酒同蛇湯。1938年廣州淪陷，西關大火，西至鎮安路東至榮街一帶（宜家嘅文化公園）都燒曬，包括蛇王滿個舖頭。第年，吳滿拍檔吳楫川，喺槳欄路41號重豎蛇王滿招牌。佛山分鋪就由吳女吳桂荷打理。1950年9月，吳滿因病辭世，終年九十四歲。

變遷

1949後，當時唔少蛇餐酒樓嘅老細走曬去外埠，1952年當局就將槳欄路嘅聯春堂、廣杏林等蛇餐館合併入蛇王滿。合併後嘅蛇王滿以原聯春堂嘅師傅馬法做主廚，集眾蛇餐店廚師精英及菜式精華於一堂。五十年代初，朱光做廣州市市長嗰陣，周時邀貴賓到蛇王滿食蛇，重寫咗一首讚美「蛇王滿」嘅詞———

「

廣州好，佳饌世傳聞，宰割烹調誇妙手，飛潛動植味奇芬，龍虎會風雲。

」

1966年文革開始後蛇王滿畀改名成衛東飯店，意係保衛毛澤東。1971年恢復原名。90年代餐館出名嘅蛇類菜肴有龍虎鳳、雙龍爭明珠、煎釀鮮蛇脯、燒鳳肝蛇片、龍虎鳳大翅等。

1999年餐館停業。而家個鋪面變成咗做服飾。

古仔

大瀝當地，而家重有俗語「蛇王滿派米」，意為好人難做，30勾打上嘅大瀝人仲重識得講。據同村嘅老伙計七叔回憶，吳滿老咗返鄉下，大概80歲開始每年做壽，就喺村嘅祠堂度派米畀同村啲窮人，件嘢傳出去後，變咗連四圍村啲鄉里都來攞米，始終米有限，自然唔係人人有份，有啲分唔到米嘅人就喺壽宴度同壽星講埋啲風涼話。後尾就有咗呢個俗語。