蜜蜂舞

蜜蜂舞（英文：waggle dance / bee dance）係蜜蜂嘅獨特語言。當一隻蜜蜂去完搵食返到個竇度嗰陣，佢會以某啲特定嘅方向、角度、同姿勢嚟喺啲同伴面前飛嚟飛去，好似跳舞噉。佢哋跳呢啲舞嗰陣飛嘅方向同角度等資訊係一種語言－佢哋靠噉嚟話俾同伴知佢去搵食嗰陣見到嘅物件－好似係花同水源－喺邊個方向同離竇有幾遠。

蜜蜂用跳舞嗰陣嘅角度同方向嚟向同伴表達搵到嘅物件嘅方向同距離。

喺呢個過程入面，蜜蜂用咗一啲抽象嘅方法嚟向同伴傳達資訊，用唔同嘅角度同軌跡代表唔同嘅意思，就好似人類講嘢嗰陣用唔同嘅聲嚟代表唔同意思噉－廣義上，蜜蜂舞經已可以算得上係一種語言。呢種身體語言會隨品種而有異－唔同品種嘅蜜蜂可能會用同一個角度或者姿勢嚟代表唔同嘅嘢，就好似人類當中講唔同語言嘅族群有陣時會用同樣嘅聲嚟代表唔同嘅嘢噉（好似「bong」呢個音喺閩南話係「王」，但喺廣東話聽落就似個「幫」字）。