西澳洲日

西澳洲日（英文：Western Australia Day），之前叫做建立日英文：Foundation Day） ，係西澳洲嘅公眾假期。每年6月嘅第一個禮拜一紀念喺1829年天鵝河殖民地嘅建立。另外，因為已經要為西澳洲日慶祝，西澳洲就唔似其他澳洲嘅州份咁慶祝6月嘅英女皇壽辰，而係改為9月或者10月慶祝女皇壽辰。

西澳洲日
其他名稱	殖民地建立日（1833–1876）；建立日（1877–2011）
參與人	西澳洲
類別	州假期
意義	1829年建立西澳洲
日期	每年6月第一個禮拜一
持續幾耐	1日
機會	每年
相關節日	澳洲日、諾福島建立日

背景

英國皇家海軍戰艦挑戰者號（HMS Challenger）喺上尉查理斯．菲萬濤（ Charles Fremantle）嘅指揮下，喺1829年4月25號喺花園島附近停泊。菲萬濤之後喺5月2號正式將澳洲西部地區宣告為屬於英國管轄。另外，商船柏蜜莉雅號（Parmelia）運載住呢個新殖民地嘅行政官，即係副總督詹姆士．史達領，以及其他官員同平民，喺5月31號晚駛近，並喺6月1號睇到海岸。最終喺6月6號，喺高斌海峽（Cockburn Sound）拋錨。另外，載住英國陸軍駐軍士兵嘅戰艦硫磺號（HMS Sulphur），就喺6月8號抵達。史達領最後喺6月11號正式宣布建立天鵝河殖民地。 載住更多平民移民嘅船隻就由8月開始陸續抵達。

而喺8月12號佐治四世嘅壽辰當日，硫磺號船長嘅夫人，海倫娜．戴安思夫人（Helena Dance）暫代艾倫．史達領夫人（Ellen Stirling），斬咗一棵樹來標誌殖民地首都珀斯嘅成立。

1832年，史達領決定每年舉行一次慶祝活動來團結殖民地嘅居民，當中包括移民、原居民以及「主人同僕人」。佢亦決定將紀念日定喺每年嘅6月1號舉行（但如果咁啱係禮拜日，就順延到禮拜一）。呢個日子本來係史達領安排柏蜜莉雅號到達嘅日子，順便表揚皇家海軍喺1794年嘅「光榮六月一號海戰」入面戰勝法國。

其實依個假期喺2011年之前，本來係叫做「建立日」。但喺2012年改名為「西澳洲日」，原因係當時要修改一系列嘅法律去承認原居民先係西澳洲最初嘅居民。