財主同拉撒路嘅比喻

財主同拉撒路嘅比喻係耶穌講嘅一個比喻，記載喺《新約聖經》《路加福音》第16章第19至31節。

聖經譯文

「	有一個財主着住靚衫，日日過住奢華嘅生活。又有一個乞兒，叫做拉撒路，成身生滿瘡，俾人放喺財主門口，希望執啲財主喺檯上面跌落嚟嘅碎嚟食，甚至連狗都舔佢嘅瘡。後來呢個乞兒死咗，天使將佢帶去亞伯拉罕身邊。財主都死咗，並且埋葬。財主喺陰間受苦，佢舉起頭望見亞伯拉罕喺嗰度，又望見拉撒路喺佢身邊，佢就呼叫話：「我嘅祖宗亞伯拉罕呀，可憐我啦！請打發拉撒路過來，用指尖蘸啲水，涼吓我條脷啦，因為我喺火焰裏面，好痛苦呀。」亞伯拉罕話：「仔呀，你應該記得你生前享過福，拉撒路亦都受過痛苦，而家佢喺呢度得到安慰，你反而受痛苦。唔單止噉，喺你哋同我哋之間，有深淵隔開，要喺呢邊過到你哋嗰邊係冇可能嘅；要喺嗰邊過到呢邊都係冇可能嘅。財主話：「祖宗呀，既然係噉，求你打發拉撒路去到我阿爸屋企嗰度，因為我重有五個兄弟，佢可以警告佢哋，以免佢哋都要來到呢個痛苦嘅地方。」亞伯拉罕話：「佢哋有摩西同先知可以警告佢哋。」財主話：「唔係噉樣，我嘅祖宗亞伯拉罕呀，假如有一個人喺死人中去到佢哋嗰度，佢哋一定會悔改。」亞伯拉罕對佢話：「如果佢哋唔聽從摩西同先知嘅話，就算有人喺死人中復活，佢哋亦唔會相信嘅。」	」
——《路加福音》16章19至31節

解釋

比喻裏面嘅財主着住靚衫，表示佢可能係貴族、政要、城中嘅精英等。佢日日奢華宴樂，同成身生滿瘡、喺財主門口乞食嘅拉撒路形成強烈對比。貧窮嘅拉撒路乜嘢都冇，淨係得個名，佢個名嘅意思正係「上帝係我嘅幫助」。財主嘅門將佢哋嘅命運分別出嚟：門裏面嘅財主生活富足，門外面嘅拉撒路靠財主檯上面跌落嚟嘅碎嚟醫肚。佢哋雖然喺好近，但係財主連伸出援手，幫助窮困無助嘅拉撒路都唔肯。耶穌用呢個比喻突顯財主死後受罰，因為佢自私冷漠，冇遵守上帝嘅教導，淨係顧住奢華逸樂，對窮乏人嘅需要無動於衷。比喻嘅結局係財主同拉撒路都死咗，兩個人嘅命運又形成強烈對比：拉撒路唔似財主噉喺陰間受苦，反而喺亞伯拉罕身邊，享有永恆嘅生命。