賴文輝

賴文輝（英文：Matthew Lai，1970年6月19號—）係荃灣區議會象石選區末任議員，香港民主黨前成員。佢亦係一位資深體育傳媒人，主力研究香港足球史。

生平

荃灣區出生及長大，台灣國立政治大學政治系畢業，香港新亞研究所碩士。

曾先後喺《成報》、《快報》、《太陽報》、《香港寬頻電視》、《蘋果日報》、《新報》等多間香港傳媒機構工作過。

2012年，賴文輝同一班熱愛研究香港足球歷史嘅人士，一齊組成「香港足球史研究組」，互相交流研究資料同埋心得。

2013年7月香港書展期間，出版個人首部著作《香港十大名將》。2014年，開始擔任《亞洲週刊》特約撰稿員。

2015年6月27日晚上，台灣新北市八仙樂園發生粉塵爆炸意外，事件中有六名本港傷者，其中莫子青係荃灣廖寶珊紀念書院畢業生，母校發起校內教師、家長同埋校友籌款，助莫家解燃眉之急。由於中學唔能夠接受校外人士捐款，所以前家長校董賴文輝聯絡「東方日報慈善基金」協助籌募善款，佢仲拍攝短片呼籲捐款。

政治聯繫

2011年香港區議會選舉，賴文輝擔任公民黨籍荃灣區議員陳琬琛選舉代理人，協助陳琬琛以2,761票高票，擊敗得1,839票民建聯對手呂迪明，成功連任。

2015年香港區議會選舉，空降三個月後報名參選，挑戰石圍角選區區議員兼公屋聯會副主席文裕明，結果以1,035票，輸俾2,356票文裕明，宣告挑戰失敗。

2016年1月14日，賴文輝喺個人Facebook專頁宣布正式加入公民黨，繼續石圍角邨負責社區工作。2017年6月8日，賴文輝宣布即日起退出公民黨。其後加入民主黨，同年12月23日，於石圍角舉辦成為民主黨社區主任後第一個活動。

2019年香港區議會選舉，賴文輝代表民主黨報名參選象石選區，獲得2,857票，擊敗得2,387票的民建聯現任區議員陳振中，成功當選，為民主黨重奪失落八年嘅象石選區。

2021年5月16日，賴文輝退出民主黨政治領袖行列。同年7月12日，賴文輝宣佈辭去荃灣區議員一職，2021年7月13日凌晨零時零分生效，結束一年半短暫區議員生涯，移居台灣。

移居臺灣後生活

佢移居臺灣後仍然關心在台港人嘅問題，間中喺傳媒發表香港人議題文章。例如：就民進黨立委林靜儀多次發佈關於香港人嘅虛假信息並藉此攻擊香港人，佢就曾經批評林靜儀，並提出一啲實質證據反駁林虛構嘅事實，佢又指，林靜儀早前先包場睇紀錄香港反送中運動嘅電影《時代革命》，依家咁樣用資訊攻擊香港人，虛偽到令人作嘔。