超距作用 (電腦科學)

喺電腦編程上，超距作用（英文：action at a distance），個名嚟自同名嘅物理學概念，係指個程式入面其中一部份出現意料之外嘅問題，而起因在於因為離嗰橛碼遠嘅另一段碼對佢作出咗影響。

例如一個長（有幾萬行碼）嘅程式，當中有好多個子程序，其中兩個子程序 A 同 B，A 會更改變數 X 嘅數值，而咁啱 B 又會用到呢個變數，如果 A 搞到 X 變咗做個 B 處理唔到嘅數值，就會搞到 B 出錯。

超距作用喺正式嘅軟件工程上係一條幾大嘅問題（因為呢啲工作要整好複雜嘅程式），常見嘅解決方法係淨係俾啲子程序同物件更改自己周圍啲局部變數，唔准佢哋更改全局變數或者離佢哋遠嘅物件嘅局部變數^[1]。