足球場

足球場係進行足球比賽嘅場地。足球場嘅基本條件係一塊長方形嘅平地，可以係草地、人造草、膠地甚至石屎地，較簡陋嘅足球場可能淨係有兩邊龍門同幾條白線，設備較好嘅足球場可能附設有燈光、看台、更衣室等設施。畀職業足球聯賽或國家隊進行比賽嘅足球場，可以喺四面設有廣告板。有啲足球場外圍可能設有田徑跑道。

標準足球場尺寸：唔係個個足球場嘅尺寸都完全一樣嘅，不過大部份足球場嘅尺寸都係105米乘68米或者115碼乘74碼。

標準足球場

足球場龍門、鵝眉月、禁區

足球場中圈

足球場嘅標準由國際足協制訂。喺青少年、元老、殘障人仕、草根足球賽事（低組別賽事），可以根據佢哋嘅意願選擇性修改：比賽場地嘅嘅大細、兩條龍門柱之間闊度同由地面至龍門橫楣底嘅高度。

草皮

草皮只可以用全天然草地或全仿真草地，唔可以天然草同仿真草混合使用，仿真草場地嘅顏色一定要係綠色。唔同地區嘅足球場嘅草皮有所唔同，但係都有一個共同點，就係只能夠由國際足協認可嘅供應商供應同種植/安裝草皮。另外，國際足協成員國可以喺國際足協許可範圍內制訂自己嘅草皮標準，例如：中國足協規定中超聯賽場地一定要係天然草皮，而加拿大就更多球場用人造草皮。

場地界線

比賽場地一定要係長方形同劃上連續嘅界線，界線唔可以構成危險；喺唔構成危險嘅情況之下，可以喺天然草地度用仿真草做場地界線。界線係屬於比賽場地嘅一部份。比賽場地界線一定要符合球例列明嘅標準先至可以進行比賽。

仿真草足球場可以有其他界線（例如欖球場界線），但係呢啲界線嘅顏色要同足球場地界線要明顯唔同，同埋可以清晰噉分辨。

標記

舉行國際性賽事嘅足球場地，長度應該喺100至110米（110至120碼）之間，闊度應該喺65至75米（70至80碼）之間。其他賽事嘅標準就比較寬鬆：90至120米（100至130碼），闊度喺45至90米（50至100碼）之間。場地要係長方形。較長嘅邊界係橫邊界，較短嘅就係底線。

中線將足球場分為兩半，喺中線嘅中間，係個球場嘅中心點，係球賽上、下半場同入波後開波嘅地方，重有中圈（半徑9.15米／10碼）圍繞中心點。

喺球場嘅4個角都劃有角球弧，係半徑1米嘅4份1圓，標示角球開出嘅地方。而4個角亦都要插有一支角球旗（最少高1.5米／5呎）。

中圈

喺開波嗰陣，唔係開波嗰隊嘅球員一定要企喺中圈之外。

龍門

龍門嘅位置喺底線上嘅中央位置。龍門由左右兩條垂直嘅門柱同連接兩條門柱嘅門楣組成。兩條門柱內邊緣距離要係7.3米（8碼），門楣嘅下邊緣就距離地面2.44米（8呎）。龍門後面通常設有網，但球例並無規定一定要有。

鵝眉月

「鵝眉月」（penalty arc）係喺禁區之外，只有喺射十二碼罰球時先用得着。

射十二碼罰球時，波要放喺十二碼點，球例規定射罰球嗰陣，所有球員（己方同對方）都一定要「離球十碼」，由底線到十二碼點係12碼，由十二碼點到禁區只有6碼，所以要以十二碼點作為圓心，畫上半徑10碼線，鵝眉月半圓啱啱好係圓周，喺呢個半圓上嘅任何一點，距離十二碼點都啱啱好係10碼，咁就符合「離球十碼」嘅規矩。

禁區

喺兩邊龍門前各劃出嘅長方形空間係禁區。

小禁區（距離5.5米 (6碼) 嘅空間），由底線、左右兩條距離龍門柱5.5米嘅直線同一條連接呢兩條線嘅直線所組成。龍門球要喺小禁區內開出。

大禁區（或禁區）（距離16.5米 (18碼) 嘅空間）亦類似，由底線、左右兩條距離龍門柱16.5米同連接呢兩條線嘅直線所組成。禁區有好多種作用，最明顯嘅係守門員喺禁區內可以用手接波，同守方喺禁區內嘅犯規可以被判十二碼罰球。

十二碼點喺龍門正中，距底線11米（12碼），係十二碼球踢出嘅地方。喺十二碼球射出前，除射波球員同守方守門員外，所有球員唔可以進入禁區同鵝眉月範圍內。