喬托《迦拿婚宴》

迦拿婚宴係《聖經》記載耶穌喺婚宴裏面將水變為酒嘅神蹟,係耶穌所行嘅第一件神蹟,喺四卷福音書之中,只有《約翰福音》有記載。當主人啲酒冇晒嘅時候,耶穌嘅阿媽馬利亞就叫耶穌幫手諗辦法。

聖經譯文

第三日,喺加利利嘅迦拿有娶親嘅筵席,耶穌嘅阿媽喺嗰度。耶穌同佢嘅門徒都有請去參加。酒冇晒喇,耶穌嘅阿媽對耶穌話:「佢哋冇酒喇。」耶穌話:「婦人,我同你有乜相干?我嘅時候重未到。」佢阿媽對工人話:「耶穌叫你哋做乜,你哋就照做。」按照猶太人潔淨嘅規矩,有六個石缸擺喺嗰度,每個可以裝兩三桶水。耶穌對工人話:「將缸倒滿水。」佢哋就倒滿咗,直到缸口。耶穌又話:「而家可以倒出嚟,拎畀管筵席嘅人。」佢哋就拎咗去。管筵席嘅人試咗嗰啲水變嘅酒,並唔知道喺邊度嚟嘅,只有倒水嘅工人知道。管筵席嘅就叫新郎過嚟,對佢話:「人都係先擺上好酒,等客人飲夠咗,先至擺上次等嘅,你反而將好酒留到而家!」呢個係耶穌所行嘅第一件神蹟,係喺加利利嘅迦拿行嘅,顯出佢嘅榮耀;佢嘅門徒就信佢喇。

——《約翰福音》2章1-11節

概覽

婚禮喺風俗上固然重要,而舊約同猶太傳統「婚筵」更係彌賽亞時代嘅象徵,同神國嘅象徵。迦拿係離拿撒勒以北九哩嘅一個鄉村小鎮,按照猶太律法,處女嘅婚禮要喺禮拜三舉行,婚後要開放新居一個禮拜,一對新人戴冠冕、着禮服,接受親友祝賀。

喺猶太人宴會之中,酒係好重要嘅,俗語說:「冇酒就冇歡樂」。喺婚筵中冇酒係一對新人嘅莫大恥辱。所以「酒冇晒」係極嚴重嘅問題,而耶穌變水為酒就令到婚筵嘅歡樂氣氛得以延續。同時,呢個神蹟亦有重大嘅屬靈意義;佢象徵一個新年代嘅來臨(酒),代替猶太人以往喺宗教上嘅傳統儀式(水)。佢係彌賽亞,為世人帶嚟新嘅希望、新嘅生命同神國嘅喜樂。

耶穌回答馬利亞嘅話「母親」原文作「婦人」。約翰福音係唯一冇指出耶穌阿媽個名嘅書卷,耶穌喺呢度開始傳道事工,同喺十字架上完成救贖大功,都稱呼佢阿媽做「婦人」,喺當時呢個表達係極具尊重嘅,而唔係不敬嘅意思,另外表示佢要脫離世上父母對子女嘅權柄,而開始接受天父差派嘅傳道事工[1]

參考