追趕式捕食

追趕式捕食zeoi1 gon2 sik1 bou6 sik6（英文：pursuit predation）係捕食最簡單直接嗰種方法，指隻捕食者追趕隻獵物。

如果隻獵物以直線跑，噉隻捕食者淨係需要跑得快過隻獵物，而如果隻獵物走佬途中掟彎，隻捕食者就要有夠快嘅反應更改自己路線；包括人類、狼、海豚、殺人鯨同埋蜻蜓都屬追趕式捕食者。

做法

睇埋：捕食

追趕式捕食者有好多策略可以採用－

• 齋靠速度：如果隻捕食者跑得極快，啲獵物唔夠佢快，就會畀佢追到；例如獵豹（Acinonyx jubatus）就係出嗮名純靠速度嘅捕食者，據報佢哋全力衝刺速度可以達到成時速 93 km 咁高；
• 鬼祟接近：想像隻捕食者身上有保護色，獵物難以睇到佢哋，噉隻捕食者可以靜靜雞伏喺（例如）草入面行近獵物，一旦距離有咁上下近，隻捕食者就開始追趕，隻獵物好可能會嚟唔切加到全速而畀捕食者追到；好似老虎（Panthera tigris）就出名鍾意用呢種做法。
• 成群追趕：狼（Canis lupus）出嗮名興成群打獵；齋講速度或者力量嘅話，狼冇獵豹咁快，又冇老虎咁大隻，但佢哋勝在好識團隊行動－想像家吓兩隻狼一齊追住隻駝鹿噉跑，一隻喺獵物左邊追，另一隻喺獵物右邊追，噉隻獵物轉左定轉右都會畀狼一嘢撲上去咬佢；而喺現實，狼往往會起碼三四隻一齊追住隻獵物嚟咬；

一隻全速衝刺緊嘅獵豹 一隻全速衝刺緊嘅獵豹  一隻老虎匿埋喺植物嘅葉入面。 一隻老虎匿埋喺植物嘅葉入面。  一群狼喺度圍攻緊隻美洲野牛。 一群狼喺度圍攻緊隻美洲野牛。

• 堅持式（persistence）：會用堅持式策略嘅獵食者通常係跑得唔快，但耐力勁兼且有返咁上下聰明嘅；呢啲獵食者冇能力齋靠速度捉住獵物，所以打獵嗰陣佢哋會靠跑一陣行一陣嘅移動模式，跟實喺隻獵物身後唔遠嘅地方；呢啲獵食者跑唔快，途中可能會畀隻獵物走甩一陣，但佢哋夠聰明，好快就可以靠跟住隻獵物嘅腳印或者留低嘅大便等嘅痕跡追上去－呢點令到隻獵物冇得唞要係噉走佬；於是乎，呢啲獵食者就一路係噉跟住隻獵物，跟成幾個鐘頭咁耐嘅時間；因為呢啲獵食者耐力好，所以最後最先會攰到走唔郁嘅會係隻獵物－而等到隻獵物走唔郁嘅時候，啲獵食者就可以上前去殺死隻冇力反抗嘅獵物。人類就出名會用呢種策略打獵。

睇埋

• 成群打獵
• 埋伏式捕食