通用心理測量

通用心理測量（英文：universal psychometrics）係指可以用嚟量度任何智能體（包括人嘅心靈同人工智能等）嘅認知特性嘅心理測量方法。

例

以下嘅概念都被指可以攞嚟做通用心理測量嘅指標：

• 圖靈測試（Turing test）：即係攞個人工智能同一個人類受試者，再加一個人類評判，睇吓評判喺睇唔到兩個受試者嘅情況下，能唔能夠用對答嘅型式分辨邊一個係人邊一個係人工智能。一般認為，如果一個人工智能做到以假亂真，就算係達到同人類智能無異。原則上，圖靈測試可以攞嚟比較兩個人或者兩隻動物都得。
• 強化學習（reinforcement learning）：即係要個人工智能程式係噉同佢周圍嘅環境互動（個環境可以係現場，又可以係一個模擬嘅環境）－喺每個時間點 ${\displaystyle \textstyle t}$，程式會產生一個用數字表示嘅動作（例如 0 代表「企喺度唔郁」同 1 代表「向前行」呀噉），而跟住佢周圍個環境會俾回輸（feedback）－簡單講就係話返俾個程式聽，佢個動作啱唔啱（例如個地下有個窿，「向前行」會跌得好痛）。而個程式跟手會用機械學習演算法改變自己嘅行為。原則上，「攞個受試者喺一個環境入面，睇吓佢點樣學識適應個環境」喺人同第啲動物身上都可以做。
• 複雜度（complexity）嘅預測：例如擺一隻動物喺一個實驗室入面，有 $n$ 個掣俾佢撳，而呢 $n$ 個掣會首先以一啲特定規律閃，閃完之後隻動物要撳「按嗰個規律，下一個會閃嘅掣」先可以有嘢食－例：想像 L 表示左邊嗰個掣，R 表示右邊嗰個掣，如果家陣啲掣以 LRLRLRLR（左掣閃完到右掣閃，重複）嘅規律閃，下一個閃嘅掣應該會係左掣，而如果家陣啲掣以 LLRLLRLL（左掣閃兩吓到右掣閃一吓，重複）嘅規律閃，下個閃嘅掣應該會係右掣... 如此類推；喺呢種實驗入面，隻動物需要了解啲掣閃嘅規律同埋預測下一個會閃嘅掣係乜；掣閃規律嘅複雜度可以由實驗者輕易噉控制同量化（可以睇吓演算法熵；algorithmic entropy），而類似噉嘅測試喺人同人工智能身上都有可能做。

睇埋

• 心理測量學
• 人工智能