進奏院粵拼zeon3 zau3 jyun2),係由大唐開始有嘅藩鎮駐京機構,駐紮喺京城長安(依家嘅陝西省西安市)。機構入邊主要係啲進奏官(粵拼zeon3 zau3 gun1),主要職務係報遞章奏同承轉詔令[1]。名義話係藩鎮同中央間嘅聯絡機搆,實際就係藩鎮蒐集中央同其他地方啲資訊嘅情報機搆[2]

原機構係叫作「上都邸務」(粵拼soeng6 dou1 dai2 mou6)、「留後使」,係指藩鎮派駐到長安嘅代表,而喺大曆十二年(777年)五月俾人改名成「上都進奏院官」 [3] 。改名後啲一般人,仲係照舊將進奏院叫做「邸」或「留後院」,而將啲進奏官叫作「邸吏」(粵拼dai2 lei6[4]

沿革

大曆十二年(777年)改成上都進奏院後,係作為各州藩鎮官員在京嘅寓所[5] ,多數起喺東市周邊嘅崇仁坊同平康坊[6]。進奏院度設有進奏官,任務係向朝廷報告所屬鎮嘅情況,所以會有邸報,使費係由地方承擔返。到宋初延續返唐制,亦設咗進奏院,置進奏官。

喺宋太宗太平興國六年(981年),當局設立咗都進奏院,強化咗對各州府進奏官嘅控制,係以京朝官監領。到南宋就轉屬咗門下省給事中,蒙元時代終結咗呢個體制[1]

運作

大唐啲進奏院係集中喺長安城東市週邊嘅幾個坊,其中係最多喺最繁華嘅崇仁坊同平康坊。據收尾學者嘅研究,隨著大明宮同興慶宮嘅落成,嗰陣時以東市為中心喺朱雀街東,係形成埋貴族同官僚嘅集中居住區。咁一嚟呢一帶喺唐後期,就成咗長安城各種情報嘅集中地,所以啲進奏院都揀埋喺度駐紮,啲進奏官日常就方便去刮料兼同權貴們打同通[7]

行政

進奏官都係由藩鎮委派嘅,唔隸屬中央。不過御史臺就有設一個台巡驅使官,進奏官照規例喺公務上係應向佢通報,定時每日到御史臺度「承應公事」[8]

日常活動

進奏院嘅任務唔係得接待、傳達、溝通幾樣。喺大唐進奏院最多嘅時候有成四五十個,係有大班嘅屬員常駐,仲會置埋屋,包埋二奶,收埋啲女眷,流連啲煙花柳巷,做埋啲生意。最早嘅匯票——飛錢,就係呢段時期啲進奏院搞嘅,係方便返自己地頭嘅商人到京城交易而開展嘅業務:

商人到埠做完生意後,就去自己地方派駐嘅進奏院度,存入自己手頭得到嘅啲金屬幣收入。進奏院就會開返聯單式嘅文牒或公據,載明交錢人嘅名堂、入數嘅數額,仲有預攞錢嘅機搆名同地點,一聯交返到商人手,一聯會寄返所轄嘅地方本部[9]。商人以一紙憑據即可隨時隨地兌換現錢[10]。等商人走嘅時候亦可以再憑證兌換返啲現錢。史稱:「以輕裝趨四方,合券乃取之,號『飛錢』。」[8]

而進奏院嘅一項主要任務就係為啲藩鎮蒐集返啲情報,自己仲有埋一套通訊系統,不過主要仲係利用返官驛嘅設備[11] 。時人係話進奏院「能傳萬里之音,不墜九霄之命」,呢種情況令到啲節度使,有時喺朝命未正式下達前,早就知道嗮公文啲內容。進奏院搞情報任務,主要會有下底嘅幾樣[12]

  1. 由公開途徑傳抄朝廷發布嘅「報狀」,製作成「進奏院狀報」 [13]報返俾節度使。呢種報刊係主要嘅收料渠道,幫助返節度使掌握到朝廷嘅政治、經濟、軍事甚至係皇室動向。
  2. 進奏官自己係會用收買、拉攏等手段,靜雞雞咁刺探情報[14]
  3. 組織啲集團搞暗殺等地下活動,進奏院呢陣時會擔當埋行動指揮嘅據點中心。

紀事

進奏院同藩鎮係互助互信嘅關係,經常為藩鎮爭取到最大嘅利益。喺文宗太和七年(833年),朝廷加盧龍節度使楊志誠為檢校吏部尚書,進奏官徐迪抗議話:「軍中不識朝廷之製,唯知尚書改僕射為遷,不知工部改吏部為美,敕使往,恐不得出。」 [15]而遇著地方政權抗命,朝廷都會搵返進奏官開刀,好似喺大和元年(827年)成德節度使王庭湊幫助咗李同捷嘅叛亂,朝廷跟著就落旨話:「其上都進奏院,宜令御史台、京兆府切加守捉,禁其出入,待敕後處分。」 [16]

參考與注釋

  1. 1.0 1.1 中国历代职官辞典 贺旭志, 贺世庆. 中国社会出版社, 2003
  2. 隋唐间谍机构 互聯網檔案館歸檔,歸檔日期2021年2月20號,. 军事间谍(上)邢春如,李穆南,竭宝峰,刘心莲 辽海出版社 2007-09-01
  3. 唐會要》,卷七八《諸使雜錄上》,1702頁,上海,上海古籍出版莊,2006
  4. 唐、宋進奏院比較硏究 北京師範大學歴史學院 李永 新材料、新方法、新視野:中國古代國家和社會變遷:國際研究生學術論壇論文集 2013
  5. 《文献通考·职官十四》:「唐藩镇皆置邸京师,以大将主之,谓之上都留后。」
  6. 宋敏求《长安志》有載:「(崇仁坊)北街当皇城之景风门,与尚书省选院最相近,又与东市相连……因是一街辐辏,遂倾两市,昼夜喧呼,灯火不绝,京中诸坊,莫之与比。」(《长安志》卷8《崇仁坊》,《丛书集成初编》第3210册)
  7. 中国古代的“驻京办事处”:进奏官狐假虎威 2010-05-11日 来源:光明日报
  8. 8.0 8.1 古代“驻京办”:唐朝最兴盛 拉动京城消费 2015-03-24 来源:中国新闻网
  9. 中國歷代經濟簡史 崧博 大佳網, 2018-01-25
  10. 不過入數並唔會全部押運返當地供商人提取。進奏院需要提取部分入數,作為地方政府向朝廷上繳嘅賦稅;地方政府自己就唔使再車過一次啲錢銀入京城。
  11. 中国古代驿站与邮传 臧嵘, 商务印书馆,1997-09
  12. 第二章 中国古代的间谍(特务)组织 互聯網檔案館歸檔,歸檔日期2021年2月20號,. 尔虞我诈:中国古代四千年谍海风云 赵英著. 北京:中国社会科学出版社,2016.6
  13. 又叫做《開元雜報》,新聞史家們認為呢個刊物,就係中國大陸嘅第一份新聞紙。
  14. 淄青進奏院就曾向本鎮密報判官高沐「潛通朝廷」。公元930年九月,四川進奏官蘇願打聽到安重誨想發兵進攻西川,馬上向孟知祥報告:「朝廷欲發大兵討西川」。
  15. 資治通鑒》卷二四四
  16. 册府元龟》卷123《帝王部》

睇埋