邢丹

邢丹（1981年10月29號—2011年4月14號）係中華人民共和國廣東省深圳市嘅一個公務員，深圳慈善歌手、「愛心大使」叢飛嘅老婆。

邢丹喺遼寧省盤錦一個有錢人屋企入便出世，係獨生女。喺瀋陽航空工業學院讀過書。2002年去到深圳實習，2003年做咗深圳航空公司嘅空中小姐。

2004年邢丹同叢飛結婚；佢哋有個女，叫邢小叢飛。結婚之後邢丹一直照顧叢飛，一路到2006年叢飛患胃癌死咗。叢飛死咗之後，佢繼續佢老公嘅慈善工作，深圳嘅網絡平台《深圳新聞網》叫佢做「了不起的女性」。

2011年4月13號夜晚11點左右，邢丹坐車去到惠深沿海高速公路惠東稔山路段嗰陣時，畀三個人（兩個係未成年）用石仔同埋石屎掟佢架車，邢丹面部被打中，搶救之後喺第二日凌晨因為失血過多過咗身。由於佢同叢飛都致力慈善，佢受襲過身呢件事喺社會引起好大反響。好多論壇都有「好人唔長命」之類嘅評論。

4月18號上晝，邢丹告別會喺深圳市殯儀館大禮堂舉行。