醫好十個麻瘋病人

醫好十個麻瘋病人係《聖經》記載耶穌嘅神蹟之一,記載喺《路加福音》17章11-19節,耶穌喺耶路撒冷嘅路途上遇到十個麻瘋病人,耶穌醫好佢哋,但係之後只有一個人返嚟多謝耶穌。

Brooklyn Museum - The Healing of Ten Lepers (Guérison de dix lépreux) - James Tissot - overall.jpg

聖經譯文

耶穌去耶路撒冷,經過撒瑪利亞同加利利中間嘅地區。佢入去一條村嘅時候,有十個麻瘋病人迎面而嚟,遠遠噉企喺度,大聲話:「耶穌,老師呀,可憐我哋啦!」耶穌睇見,就對佢哋話:「你哋去,將身體俾祭司檢查。」佢哋去嘅時候就潔淨咗。其中有一個睇見自己已經好返,就返嚟大聲歸榮耀頌讚上帝,又跪喺耶穌腳前感謝佢。呢個人係撒瑪利亞人。耶穌回答話:「得到醫治嘅唔係有十個人咩?另外九個喺邊度呢?除咗呢個外族人,再冇其他人返嚟歸榮耀畀上帝呀?」於是耶穌對嗰個人話:「起身,去啦,你嘅信心救咗你!」

——《路加福音》17章11-19節

概覽

當耶穌沿住加利利同撒馬利亞嘅邊界行走,遇上十個痳瘋病人。按照當時律法規定,佢哋必須保持距離,因此佢哋唔敢靠近人群,只能夠遠遠噉大聲呼叫,求耶穌憐憫。可以知這一班麻瘋病人嘅孤單同隔絕。喺呢十個麻瘋病人之中,至少有一個係撒馬利亞人。喺呢度俾我哋睇出有關生命嘅大原則;就係因為大家都有共同嘅不幸遭遇,而溝通咗種族同國家嘅界限。原來猶太人同撒馬利亞人大家都有冤仇,互不來往。但係因為有同病相憐嘅遭遇,已經唔再計較種族間嘅仇恨。

耶穌雖然對佢哋嘅呼喊聲作出回應,但係冇摸或接近佢哋,只向佢哋發出一個簡單嘅命令:要佢哋去將自己嘅身體俾祭司檢查。呢個係麻瘋病人得到醫治之後嘅正常手續。祭司係扮演健康檢查者嘅角色,證實佢哋已經好返。耶穌並冇對佢哋話:「你哋得到醫治喇!」而係要求佢哋採取信心嘅行動,順服而得醫治。

十個得到醫治嘅人,只有一個返嚟感謝耶穌。可以見到人嘅忘恩負義,喺現實生活裏面,都有唔少呢個情況。耶穌好快噉指出,嗰個返嚟感謝嘅唔係猶太人,而係外族人。外邦人因為有信心而比猶太人更能夠得到上帝嘅義[1]

參考