金鷹 (馬騮)

金鷹（1997年—2015年11月26號）係一隻雌性馬騮嘅名，生活於香港九龍城，以表演猴戲、同做主人自製「陳標記疳積散」代言人為生計。金鷹喺2015年11月26號因嚴重脫水，身體多處骨折，而且有嚴重腦障礙等問題，獸醫判斷其病情無法復原，喺同日下晝進行安樂死。

主人

小猴子金鷹唔係野生動物，喺2007年係10歲，佢原來嘅主人陳日標，人稱“陳伯”。喺2004年6月下旬，因為陳伯心臟衰竭去世，享年93歲，所以財產繼承，猴子金鷹最後嘅主人係陳耀榮，佢陳伯嘅三兒子。

事件

因為香港法例第170章《野生動物保護條例》第8條，禁止管有受保護野生動物，飼養瀕危絕種野生動物。陳伯無香港特區政府發出嘅許可證，而飼養猴子金鷹，因為咁被舉報。漁農自然護理署喺2000年5月，把「金鷹」帶走，令陳伯同金鷹分離，事件俾香港傳媒廣泛報道，漁護署被香港市民口誅筆伐，飽受輿論壓力。同年7月，陳伯跟漁護署對簿公堂，最終獲酌情權處理，陳伯領得漁護署有史以來發出首張飼養馬騮嘅牌照。

陳標記疳積散

2007年，喺眾多產品懷疑含有各種不良成份嘅大浪潮中，猴子金鷹代言嘅陳標記小兒疳積散，喺6月懷疑含有水銀成份0.12%。金鷹主人聲稱，陳標記小兒疳積散可以杜蟲、開胃、除口臭、防便秘及牙肉紅腫等，男女老幼都適合使用，售賣已經有近50年歷史，從前未收過投訴。不過香港醫院管理局毒理參考實驗室，經過剩餘產品化學分析發現，疳積散係含有微量水銀成份，如上。根據中文大學醫學院食物及藥品安全研究中心主任陳恩強估計，疳積散嘅成份含有硃砂、輕粉、百降丹等，係礦物質，有機會含有水銀。