鏡像書寫

鏡像書寫（粵拼：geng3 zoeng6 syu1 se2）就係寫嘢嘅時候唔寫正常寫法，反而將文字寫成鏡像，重連書寫方向都要調轉埋。鏡像書寫寫出來嘅文字，喺塊鏡裡面產生嘅鏡像就會係正常嘅文字。今日好多緊急服務車輛，例如消防車同救護車等，就會喺車頭用鏡像文字寫著「消防車」同「救護車」等，前邊嘅司機通過倒後鏡，就會睇到正常嘅「消防車」同「救護車」等字。

好多地方嘅救護車都會喺車頭印有「救護車」伊個詞嘅鏡像書寫。

達芬奇嘅《維特魯威人》上面嘅筆記全部都係鏡像文字。

歷史上最出名嘅鏡像書寫人之一係達文西。佢絕大部份嘅手稿都係鏡像書寫，但係點解佢要用鏡像文字寫筆記，就到宜家都眾說紛紜。

一項研究認為，一個人識得寫鏡像文字，好可能係因為佢個腦部處理語言嗰部份嘅運作同其他人嘅大腦唔同，而寫鏡像文字嘅潛力好可能係先天決定嘅。而另一項由北海道大學醫學院進行嘅研究，就認為寫鏡像文字嘅能力係被腦部病變或者損傷激發嘅。