長堤大馬路

長堤大馬路 CHANGDI ROAD

長堤大馬路入面

性質： 一般馬路 全長： 0.892公里 行車線： 3車道 東向西嘅單行線 地區： 廣州市越秀區 起點： 沿江西路 （愛群大廈附近） 終點： 沿江西路 （解放路口附近） 主要建築： 愛群大廈 東亞大酒店

長堤大馬路（粵拼：coeng4 tai4 daai6 maa5 lou6）係中國廣東省廣州市一條主幹道，喺越秀區入面。成條馬路係東西走向，呢條馬路嘅東西兩邊都係沿江西路，成條馬路嘅樣好似有好細嘅弧度噉。

概要

全長892米，闊12米，3車道。凈係可以從東邊向西邊行。

史

1930年嘅長堤大馬路，喺嗰陣時係重未有新嘅填地，而圖入面嘅箭咀就係海珠公園入面嘅海珠石。

呢條馬路喺1920年嗰陣，中華民國廣州市政府就喺珠江邊起咗條堤壩，重整咗條路出嚟，就將呢條路嗌做「長堤大馬路」呢隻名。喺嗰陣時重係個新嘅商業區。入面曾經出現過「大三元酒家」、「大公餐廳」、「先施公司」、「海珠大戲院」呢啲名店。但係到咗20世紀底，喺長堤大馬路入面嘅大部份老字號嘅檔口冚唪唥都執嗮笠，重有啲係搬走咗添，搞到以前嘅一片繁華景都冇嗮。後嚟到咗2012年，廣州市政府就提出咗規劃，要重新旺返個長堤，恢復返以前老字號雲集嘅繁華景象。

經過嘅道路

呢度啲路順序係從西去到東嚟排嘅，其中加粗咗嘅字係主幹道：

• 沿江西路
• 海珠南路、新堤三橫路
• 新堤二橫路
• 新堤一橫路
• 靖海路
• 沿江西路

特色

長堤呢度係以前廣州入面嘅其中一個繁華地帶，入面有好多間老字號酒家同埋百貨，而呢度都重有好多歷史建築，佢重喺成個廣州嘅老城區入面，騎樓保存得比較好嘅一條路。而家重有好多酒吧、卡拉OK、夜總會同埋遊戲機室呢啲娛樂場所，係廣州夜生活嘅其中一個熱門地區。