開氏

  「開爾文」跳轉到呢度。想搵同名科學家，請睇「開爾文男爵」。

開氏，又叫開爾文，係個量度温度嘅單位，屬於七個國際單位制嘅基本單位之一，符號K。

開氏溫標係個熱力學溫標，開氏嘅零度稱為絕對零度。1開氏定義做水嘅三相點嘅熱力學溫度（準確值 0.01°C）嘅273.16分之1。

開氏呢個名係取自喺北愛爾蘭貝爾法斯特出世嘅物理學家暨工程師威廉‧湯姆森（William Thomson, 1st Baron Kelvin）嘅頭銜（第一代開爾文男爵）。開氏同攝氏度（°C）或者華氏度（°F）唔同，佢唔使加上「度」（°）。佢主要用喺物理學上表示温度。1開氏嘅温差同1攝氏度嘅係相等。水嘅三相點減273.16K就係絕對零度（準確值 -273.15°C）。