閏秒
校正民用時間，同地球自轉同步
閏秒，校正時間措施，校正原子鐘時間，同天文觀測一致。西曆，六月三十號尾，十二月卅一號尾，都有機會加一秒，減一秒。人紀時本來就以天文現象定義，自有原子鐘之後，由於佢好準確，就用原子鐘計算時間。然而天文現象並非平均而行，天體運行受好多因素影響，地球自轉會輕微減慢，大地震改變地球重心，咁就同原子鐘計算有輕微之差，個差年年唔同，半年會公佈一次要否校正。為咗實際生活所用時間，同天文現象相合，有必要校正一下。至今都只有加一秒嘅情況，未曾遇上減一秒。
現時一般人所用，都基於協調世界時間，以原子鐘計算，同天文定義嘅世界時間有啲唔同。閏秒用來較正協調世界時間。若果加一秒，廿三點五十九分五十九秒之後，就到廿三點五十九分六十秒，先至到下一日〇點〇分〇秒。減一秒就無咗廿三點五十九分五十九秒，廿三點五十九分五十八秒之後，直跳下一日〇點〇分〇秒。
不過電腦時代，程式一般都無理會閏秒，唔為意會搞到計算出錯，有時後果會好嚴重。尤其東亞地方，閏秒嗰刻喺日間工作時間，股市、航行等，都有影響。六十秒嘅寫法，亦唔係所有標準都過到。實際有啲方法，如遇加一秒，就將系統時間相對減慢，分擔多咗嘅一秒。閏秒不能預測，故此寫唔能寫死，只能隨公佈防範出錯。故此，有人提議取消閏秒，另立方法。然而各國意見分歧，畢竟要顧及天文校正，二〇一五年決定保留，直至二〇二三年再議。
文
編輯閏秒繙自英文Leap second。