閻麗夢

閻麗夢，前香港大學公共衛生學院傳染病研究中心嘅病毒同免疫學博士後研究員。因為喺2020年4月底前往美國後揭發中國政府隱瞞武漢肺炎疫情而受到關注。

就武漢肺炎發表嘅言論

佢自2020年1月，就開始匿名警告外界，話病毒源於中國解放軍實驗室，而且係被蓄意釋放出嚟。佢又話，中共嘅目的係為咗癱瘓敵國嘅醫療系統。

喺2020年10月10號，閻麗夢接受班農訪問嘅時候，話自己接觸過一啲美國政府頂級專家，佢哋都認同隻病毒係人造。

喺2021年5月8號，《週末澳洲人報》披露咗一份2015年嘅文件，係中國流行病學專家徐德忠同曾參與抵抗SARS嘅醫學博士李峰一齊撰寫，據稱係中國軍事教材專書嘅《非典非自然起源和人制人新種病毒基因武器》，當中提到點樣將SARS冠狀病毒武器化，同埋預測第三次世界大戰將以生物武器形式出現。喺無耐之後，閻麗夢接受《今日印度》專訪，話呢份文件，正好證明中國有長期開發非傳統生物武器嘅計劃，藉此征服全世界，而當世人意識到病毒源於中國實驗室嘅時候，中國嘅目標就否認並利用假資訊嚟誤導世界。