陀地費

  提示：呢篇文講嘅唔係環境保護費。

收陀地（費）（粵拼：to4 dei6*2 (fai3)）或者收保護費，係種黑社會常用嘅揾錢方法，通常都唔合法。呢種生意喺低踎嘅街、商場同埋小販區特别普遍，尤其係啲有唔太正路（例如賣冒牌貨、無攞正牌擺檔、走税、交易賊贓、黃賭毒……）勾當嘅地方。收陀地（費）嘅多數係啲同樣俗稱陀地，唔正經嘅人，然而呢種賺錢手段，並唔係幫會嘅專利。

典型解釋

保護費係黑幫靠嚇，靠搗亂，向勢力範圍入面嘅商人勒索嘅錢銀，要人哋定期交。否則就搞亂檔，阻住佢做生意。

其他解釋

唔交保護費，最可能嘅後果係俾（叫攞錢嘅或者其他）匪徒傷害人身或者財產。由於唔少治安部門同幫會都有貪腐嘅商業合作，商家或者會俾政府選擇性針對執法，甚至老屈，兼出動埋政府司法部門迫害。

亦有執法者唔只知法犯法，重要肆無忌憚，親自出馬收保護費。收到錢，就將本應出手阻止嘅嘢，當睇唔到。

有啲保護費用途同「街道租金」差唔多，所用來買嘅「服務」，係趕走同行對手。喺某啲熱鬧嘅街上面，無牌收買佬/婆同埋小販分布得井然有序，河水不犯井水，正係由於呢種商業模式作祟。

詞義分析

顧名思義，「保護費」就係用嚟買「保護服務」嘅「使費」。而所謂「保護」，即係防止渠俾人哋搞。會想施害嘅，可以係商人（合法同非法嘅都包）、無組織麻煩人（獨行賊、鬧事友……）或者有組織匪類（幫會、妄顧法紀嘅政府部門……），亦唔少得嗌攞保護費嗰個/班人。收保護費嘅，除咗法外團體之外，重有目無法紀嗰啲官府中人（由黑幫度領分贓或者親自去收嘅都有）。當用詞係派片或收片，通常指收錢方係官方執法者。

喺政府無好好維持治安嘅地方，民間就好可能會有組織冒起，自己管理。雖然渠哋有大把會作奸犯科，但係往往會自設規則（未必公道）來維持秩序。通常，商人只係要交保護費畀嗰處勢力最大嘅黑幫（用「甲」作代號），若果突然有另一派（簡稱「乙」）嗌渠交保護費，商人就會叫甲「保護」——即係用江湖手段同乙決定之後誰主浮沈。

約定俗成，「保護費」多數帶啲唔跟法律嘅意思。正式請有牌看更/保鏢嘅使費，一般叫做「管理費」/「保安費」。時移世易，家陣「陀地（費）」常聽過「保護費」。